Ezae avọ eyae buobu a rẹ rria kugbe taure a tẹ te rọo ohwohwo. Ahwo jọ a re ru onana re a riẹ sọ aimava na a fo ohwohwo, sọ orọo rai o te tọ nọ a tẹ rọo no, hayo re a riẹ sọ a ti wo evawere. Kọ u fo re ọzae avọ aye a rria kugbe taure a tẹ te rọo?

Ma te ta kpahe eware nana

•  Eme Ebaibol na ọ ta?

•  Nọ imava a tẹ rria kugbe taure a tẹ te rọo, kọ ẹsiẹe a sae rọ ruẹrẹ oma kpahe ziezi kẹ orọo?

•  Nọ imava a tẹ rria kugbe taure a tẹ te rọo, kọ ẹsiẹe a gbe ro wo ẹbẹbẹ ugho ho?

•  Nọ imava a tẹ rria kugbe taure a tẹ te rọo, kọ ẹsiẹe a sai ro wo emamọ ọzae hayo aye?

•  Kọ u wo edhere ọfa jọ nọ o mai woma?

•   Ebaibol na o mukpahe ọzae avọ aye nọ a re rọo ho nọ a rẹ wezẹ kugbe ohwohwo. Wọhọ oriruo, Ebaibol na ọ ta nọ: “Siomano ọfariẹ-ogbe.” (1 Ahwo Tẹsalonika 4:3; 1 Ahwo Kọrint 6:18) Oyena u kugbe ọzae avọ aye nọ a be rria kugbe, o tẹ make rọnọ a gwọlọ rọo ohwohwo ẹdẹ jọ. a Ehrẹ Ebaibol e sai fiobọhọ kẹ ọzae avọ aye nọ a gbe ro yẹ ọmọ no taure a tẹ te rọo ho. Yọ ehrẹ Ebaibol e rẹ jẹ thọ ae no ebẹbẹ efa nọ i re ta ahwo nọ a be rria kugbe taure a tẹ te rọo.

•   Jihova họ ọnọ ọ to orọo họ. Okenọ ọ to orọo ọsosuọ họ, ọ ta nọ: “Ọzae ọ rẹ rọ nyasiọ ọsẹ riẹ gbe oni riẹ ba ọ vẹ talamu aye riẹ, a ve zihe ruọ uwo ovo.” (Emuhọ 2:24) Nọ ọzae avọ aye a tẹ gbaemu nọ a rẹ talamu ohwohwo, ẹsiẹe uyoyou gbe evawere e rẹ jọ orọo rai, orọo na o vẹ jẹ tọ.

 Ahwo jọ a rẹ ta nọ Ee. A re roro nọ ọmọzae avọ ọmọtẹ nọ a gwọlọ rọo a tẹ be rria kugbe je ru eware uwou kugbe, ẹsiẹe a rẹ riẹ ohwohwo jẹ riẹ kpahe orọo ziezi. Rekọ oware nọ o rẹ mae lẹliẹ evawere jọ orọo họ, nọ ọzae avọ aye a tẹ gbaemu nọ a rẹ talamu ohwohwo.

 Ẹvẹ ọzae avọ aye a sae rọ riẹ epanọ a rẹ talamu ohwohwo te eware e be riẹ nya hayo e be riẹ nya ha? Orọnikọ nọ a tẹ rria kugbe ohwohwo ho, keme nọ a tẹ be rria kugbe, a re rri usu na wọhọ oware nọ a rẹ sae fa lọlọhọ nọ eware e gbẹ be riẹ nya ha. Ukpoye, usu imava o rẹ ga nọ a tẹ gbaemu nọ a rẹ talamu ohwohwo, je ru eware kugbe re a sae ku ebẹbẹ rai họ.

 Ẹme na họ: Nọ ọzae avọ aye a tẹ rria kugbe no taure a tẹ te rọo, ukpenọ onana u fiobọhọ kẹ ae evaọ orọo rai evaọ obaro, u re ru ei lọlọhọ kẹ ae re a fa orọo rai.

 Ohrẹ Ebaibol: “Oware kpobi nọ ohwo ọ be kọ, oye o ti vu re.”—Ahwo Galesha 6:7.

 Ahwo jọ a rẹ ta nọ Ee. Evaọ ekiakiẹ jọ nọ a ru evaọ Pew Research Center evaọ United States, a ruẹ nọ evaọ usu imakpe nọ e be rria kugbe ohwo nọ a re rọo ho, imane a jiroro yena keme a roro nọ a ti gbe wo ẹbẹbẹ ugho ho. Rekọ nọ a rria kugbe te omoke jọ no, ahwo nana buobu nọ a kiẹriwi na a ta nọ a ri te epanọ a rẹ rọ rọo ho keme a wo ugho ho.

 Nọ ọzae avọ aye a tẹ rria kugbe taure a tẹ te rọo, ebẹbẹ efa i re noi ze maero rọkẹ ọmọtẹ na. Wọhọ oriruo, nọ usu na ọ tẹ fa, ẹsibuobu aye na họ ọnọ ọ rẹ yọrọ emọ nọ a yẹ jẹ rẹrote ae.

 Ẹme na họ: Ebẹbẹ nọ i re noi ze nọ ọzae avọ aye a tẹ rria kugbe taure a tẹ te rọo i re bu vi irere nọ a roro nọ a ti wo.

 Ohrẹ Ebaibol: “Mẹ Jihova, mẹ họ Ọghẹnẹ ra, Ọnọ o bi wuhrẹ owhẹ re who wo erere kẹ omara.”—Aizaya 48:17.

 Ahwo jọ a rẹ ta nọ Ee. Obe jọ nọ a re se Fighting for Your Marriage o ta nọ, “O rẹ jọ bẹbẹ kẹ ahwo nọ a be rria kugbe taure a tẹ te rọo re a fa usu na.” Fikieme? Ezae avọ eyae jọ nọ e be rria kugbe a rẹ ruẹ uwhremu na nọ a fo ohwohwo ho. Rekọ fikinọ a wo eware jọ kugbe, o rẹ jọ bẹbẹ re a fa usu na. Wọhọ oriruo, a sai wo arakọ, hwosa fihọ uwou kugbe, hayo o sae jọ nọ aye na o dihọ no. Ahwo nọ a re ru ekiakiẹ a ta nọ oghẹrẹ ahwo otiọnana “a rẹ gbẹ rria kugbe ghele keme u wo oware ovo nọ a rẹ gbẹ sai ru hu.” b Obe na Fighting for Your Marriage o ta nọ, “ahwo jọ nọ a hae te gwọlọ nọ a rẹ fa usu na a rẹ rọo ghele keme a ruẹ nọ oyena o mae lọhọ kẹ ae.”

 Ẹme na họ: Nọ imava a tẹ be rria kugbe taure a tẹ te rọo, o rẹ jọ bẹbẹ re a fa usu na o tẹ make rọnọ a fo ohwohwo ho. Fikiere a te sae jẹ emamọ iroro ho.

 Ohrẹ Ebaibol: “Ohwo nọ o wo areghẹ ọ rẹ ruẹ oware enwoma, o ve siomano, rekọ ogbori ọ rẹ nyaruọ ẹe, ọ vẹ reoja oware nọ u re noi ze.”—Itẹ 22:3.

 Whọ sai wo evawere jẹ whaha ebẹbẹ nọ i re te ahwo nọ a rẹ rria kugbe taure a tẹ te rọo. Ẹvẹ onana o sae rọ lọhọ? Nọ who te lele ehrẹ nọ Ebaibol na ọ kẹ kpahe orọo. Daoma ruẹ nọ whọ riẹ ohwo nọ whọ gwọlọ rọo na ziezi taure wha tẹ te rọo, keme nọ wha tẹ rọo no, wha te rria kugbe. O mai woma re whọ rọo ohwo nọ whẹ avọ iẹe wha gbe wo utee ovona, gbe ohwo nọ wha gbẹ rọwo eware evona. Eware nana i wuzou vi isiuru owezẹ ọzae-avọ-aye nọ a rẹ rọ karo.

 Ehrẹ nọ e rrọ Ebaibol na e rẹ sai fiobọhọ kẹ owhẹ ru eware nọ e rẹ wha evawere se owhẹ nọ whọ tẹ rọo no, jẹ lẹliẹ orọo na tọ. c Wọhọ oriruo, ehrẹ Ebaibol na e sai fiobọhọ kẹ owhẹ . . .

•   whaha ọfariẹ-ogbe

•   wo uruemu nọ o rẹ lẹliẹ owhẹ jọ emamọ ọzae hayo emamọ aye nọ whọ tẹ rọo no

•   riẹ sọ ohwo nọ wha avọ iẹe wha be nyusu orọo wha fo kẹ ohwohwo

 Re whọ gbẹ riẹ kpahe izoẹme nana, kpohọ oria “Orọo gbe Uviuwou” evaọ jw.org.

 Ohrẹ Ebaibol: “Ẹkwoma ẹzi Ọghẹnẹ a ro kere Ikereakere na kpobi, yọ e rẹ kẹ erere nọ a tẹ be rehọ ai wuhrẹ.”—2 Timoti 3:16.