“Ikpe ezeza ọmọtẹ mai ọ jọ evaọ oke ọsosuọ nọ ma ro lele iei ta ẹme kpahe udi ogaga. Rekọ u gbe omai unu gaga inọ oke nana yọ ọ riẹ eware buobu kpahe udi ogaga no.”—Alexander.

•  Oware nọ whọ rẹ riẹ

•  Oware nọ whọ rẹ sai ru

•  Oware nọ Ebaibol na ọ ta kpahe udi ogaga

 Re a ta ẹme kẹ emọ kpahe udi ogaga u wuzou. Whọ hẹrẹ bẹsenọ ọmọ ra ọ rẹ kpako te uzoge tao ho. Khamit nọ ọ be rria obọ Russia ọ ta nọ: “Dodokọ okenọ ọmọzae mai ọ rọ gbẹ jọ ọmaha ma rọ ta ẹme kẹe kpahe oware nọ u gbe ro fo re ohwo ọ da udi ogaga vrẹ oma ha. Oware ogaga u ru omẹ no taure mẹ tẹ te riẹ nọ ere mẹ hai gine ru. Kpakọ okenọ ọmọzae mẹ ọ jọ ikpe ikpegbesa o ro mu idi họ ẹda.”

 Fikieme who gbe ro rri ẹme nana evevere he?

•   Eware nọ emọ-eklase ọmọ ra a be hai ru, te eware nọ ọ be gaviezọ kẹ evaọ etẹlẹvisiọno, iredio gbe itanẹte ẹ rẹ sai kpomahọ oghẹrẹ nọ o rri udi nọ u re mu.

•   Ukoko jọ nọ o rẹ kiẹ ọto eyao je ru epanọ a rẹ rọ whaha ae o ta nọ a tẹ ghale udi ogaga nọ a be jọ America soso da kpohọ abọ udhusoi, emaha na a be da abọ ikpegbọvo.

 Oyejabọ nọ otu nọ o wuhrẹ kpahe eyao a rọ ta nọ jọ esẹgbini a wuhrẹ emọ rai no emaha ze kpahe oghẹrẹ nọ udi nọ u re mu u yoma te. Ẹvẹ whọ sai ro ru onana?

 Roro kpahe enọ nọ ọmọ ra ọ te nọ owhẹ. Emọ a rẹ gwọlọ riẹ eware buobu, yọ enọ e kpako no omojọ a rẹ tubẹ mae nọ enọ. Fikiere, ruẹrẹ oma kpahe kẹ enọ nọ a te nọ owhẹ. Wọhọ oriruo:

•   Ọmọ ra ọ tẹ nọ owhẹ kpahe oghẹrẹ nọ udi ogaga o rẹ jọ evaọ unu, whọ sae vuẹe nọ udi o rẹ dina kenye agba, yọ ebiẹ ọ rẹ yare.

•   Ọmọ ra ọ tẹ gwọlọ dawo udi ogaga, whọ sae vuẹe nọ udi utiona o ga hrọ kẹ emaha na. Ta kẹe oghẹrẹ nọ u re ru ohwo, wọhọ oriruo whọ sae vuẹe nọ u re ru udu te ohwo otọ nọ a tẹ da umutho, rekọ u te bu hrọ u re ru aro vughu ohwo, lẹliẹ ohwo ru eware igheghẹ jẹ ta eme nọ ọ rẹ vioja rai uwhremu na.—Itẹ 23:29-35.

 Wuhrẹ omara. Ebaibol na ọ ta nọ: “Ohwo nọ o re rri otọ mu ọ [rẹ] riẹ oware nọ o bi ru.” (Itẹ 13:16) Daoma riẹ oware nọ udi nọ u re mu o rẹ sai ru ohwo, gbe izi nọ egọmeti o fihọ kpahe iẹe evaọ orẹwho ra. Onana u re ru owhẹ riẹ oghẹrẹ nọ who re ro fiobọhọ kẹ emọ ra.

 Mu ẹme udi họ kugbe emọ ra. Ọsẹ jọ nọ a re se Mark evaọ obọ Britain ọ ta nọ: “Ẹme kpahe udi ogaga ọ rẹ jọ emaha na aro gede gede. Ẹdẹ jọ mẹ nọ ọmọzae mẹ nọ ọ rrọ ikpe eree sọ u fo re a da udi ogaga hayo u fo ho. Oke gheghe nọ mẹ avọ iẹe ma jọ kugbe mẹ rọ nọe, onana u te ru nọ ọ rọ ta eva riẹ kpobi kẹ omẹ.”

 U ti fiobọhọ kẹ ọmọ ra gaga nọ whọ tẹ be rọ oke sa-sa ta ẹme kẹe kpahe udi ogaga. U te no ẹme udi ogaga no, whọ sai lele ọmọ ra ta eme efa nọ i wuzou re, wọhọ epanọ a sae rọ yọroma evaọ edhere, gbe ẹme kpahe owezẹ ọzae-avọ-aye nọ who te rri nọ ọmọ ra o te epanọ o re ro wo otoriẹ eware nana no.

 Fi emamọ oriruo hotọ. Emọ a rẹ rọ aro kele amọfa gaga, yọ ọkiẹriwo nọ a ru u dhesẹ nọ esẹgbini eye emọ a rẹ mae rọ aro kele. Onana u dhesẹ nọ whọ tẹ be hae da udi ogaga rọ kpairoro evaọ okenọ who wo ẹbẹbẹ, ọmọ ra o ti roro nọ udi ogaga nọ a rẹ da họ ifue kẹ ebẹbẹ uzuazọ. Fikiere, fi emamọ oriruo hotọ. Daoma ruẹ nọ whẹ omara whọ be hae da umutho udi gbe evaọ okenọ u fo ọvo.