AKPE 18, 2023
IYẸRẸ AKPỌ SOSO
A Ru Okokohọ Ologbo Ọsosuọ Evaọ Ẹvẹrẹ Jamaican Creole gbe Pennsylvania German
A ru okokohọ ologbo evaọ ẹvẹrẹ Jamaican Creole gbe Pennsylvania German evaọ Ahrẹ 2023. Onana o jọ orọ ọsosuọ kpobi. Enwenọ ahwo nọ a bu te idu ivẹ (2,000) ae a kokohọ kẹ Okokohọ Ologbo “Wo Odiri”! nọ a ru evaọ evẹrẹ nana.
Jamaican Creole, Jamaica
Inievo-emetẹ nọ e be ta ẹvẹrẹ Jamaican Creole a bi dede ahwo nọ a ziọ okokohọ na rehọ, yọ a kru obe nọ a kere fihọ nọ “Welkom!”
Evaọ Jamaica, ẹvẹrẹ nọ a rẹ mae ta họ Oyibo. Rekọ ahwo buobu nọ a be rria orẹwho na a rẹ ta Jamaican Creole re. Evaọ usu ahwo nọ a bu te odu ọvo gbe egba ihrẹ (1,700) nọ i kpohọ okokohọ na, ahwo jọ a no United Kingdom gbe United States ze. A ru okokohọ na evaọ Marlie Technology Park nọ o rrọ Old Harbour, evaọ Jamaica, no edẹ 14 rite 16 Ahrẹ, 2023. Ahwo ikpegbivẹ ae a họ-ame.
Eva e were inievo emezae gbe erọ emetẹ mai nọ e be ta ẹvẹrẹ Jamaican Creole gaga. Onana họ orọ ọsosuọ nọ a rọ gaviezọ kẹ okokohọ nọ a ru evaọ ẹvẹrẹ rai. Oniọvo-ọmọtẹ jọ nọ a re se Tenesha Gordon ọ ta nọ: “Evaọ ẹdẹ nọ okokohọ na o ro muhọ, nọ oniọvo-ọmọzae nọ ọ jọ eplatfọmo ọ rọ ẹvẹrẹ Jamaican Creole yere ogbotu na, ame o su no omẹ aro ze. Eme nọ a jẹ ta e jẹ mere omẹ oma ọvo. Mẹ gwọlọ nọ okokohọ na o re kuhọ họ!”
Pennsylvania German, United States
Inievo nọ i kpohọ okokohọ a kru obe nọ a kere fihọ nọ, “Ma Dede Owhai Rehọ Ziọ Okokohọ Ologbo Ọsosuọ Evaọ Ẹvẹrẹ Pennsylvania German”
Ahwo nọ a be ta ẹvẹrẹ Pennsylvania German evaọ Canada gbe United States a bu te oware wọhọ idu egba ene (400,000). Ahwo a rẹ mae ta ẹvẹrẹ German nana evaọ ewho Amish gbe Mennonite. Inievo emezae gbe erọ emetẹ nọ e rrọ ikoko Pennsylvania German isoi gbe utu ọvo, eye i no ubrotọ sa-sa ziọ okokohọ na. No edẹ 7 rite edẹ 9 Ahrẹ, 2023, ahwo nọ a kpohọ okokohọ na evaọ Ọgwa Okokohọ Coraopolis evaọ Pittsburgh, Pennsylvania, U.S.A., a bu vi egba ivẹ (200).
Ẹvẹrẹ Pennsylvania German ọye Brọda David Miller ọ riẹ epanọ a rẹ ta notọ avọ otọ ze. Isẹri Jihova a tẹ rọ Oyibo wuhrẹ iẹe Ebaibol na. Rekọ o vrẹ ikpe udhegbisoi no. Evaọ oke yena, o roro ẹdẹvo ho inọ a ti wo ikoko ẹvẹrẹ Pennsylvania German, kabikọ okokohọ ologbo nọ a ti ru evaọ ẹvẹrẹ na. Ọ ta nọ: “Okokohọ na o were wumuo ho! Mẹ jẹ gaviezọ kẹ oware kpobi. Fikinọ ẹvẹrẹ mẹ a jẹ ta, eme na i je te omẹ udu.”
Eva e were omai kẹ inievo emezae gbe erọ emetẹ mai nọ i kpohọ okokohọ obọdẹ nana. Ma yere Jihova, ọnọ o ru rie lọhọ re mai kpobi ma ta ẹvẹrẹ ọgbagba na.—Zẹfanaya 3:9.