ANE 10, 2020
IYẸRẸ AKPỌ SOSO
Ekareghẹhọ nọ A Ru Evaọ 2020—Ebẹtẹle nọ O Rrọ Obọ United States
Evaọ Ane 7, 2020, evaọ udevie okpẹyao coronavirus nọ ọ rrọ otọ na, Isẹri Jihova wariẹ akpọ na soso họ a ru Ekareghẹhọ uwhu Jesu Kristi na. Wọhọ epanọ Brọda Stephen Lett nọ ọ rrọ Utu Ẹruorote na ọ ta: “Ẹyao ọvo ọ riẹ hẹ, o tẹ maki vo ruọ oria kpobi evaọ akpọ na, nọ o re ru nọ ma gbẹ sai ro dhesẹ edẹro kẹ oware nọ Jihova Ọghẹnẹ avọ Jesu Kristi a ru kẹ omai hi, hayo oghẹrẹ ẹyao jọ nọ ọ rẹ whae ze nọ ma gbẹ sai ro ru Emu Owọwọ Olori na ha, ẹyao otioye ọ riẹ hẹ.” Oghẹrẹ vẹ ma sai ro ru onana evaọ ukpe nana?
Onana họ o rrọ ọsosuọ evaọ iyẹrẹ nọ ma ti fihọ Oria Iyẹrẹ mai na, enọ e te ta kpahe epanọ inievo mai wariẹ akpọ na soso họ a ro ru Ekareghẹhọ na evaọ etoke ẹyao coronavirus na. Ma te jọ iyẹrẹ ọsosuọ nana ta kpahe epanọ a ro ru Ekareghẹhọ na evaọ obọ ehri ukoko Isẹri Jihova gbe uwou ogha nọ o rrọ United States.
Re a ru lele uzi egọmeti nọ o ta nọ ahwo a kokohọ oria buobu hu, Utu Ẹruorote na o tẹ jiroro nọ Ekareghẹhọ ọvo inievo kpobi nọ e rrọ uviuwou Ebẹtẹle United States na a ti ru. Brọda Anthony Morris họ ọnọ ọ kẹ ovuẹ Ekareghẹhọ na, yọ ọ kẹ ovuẹ na evaọ ọgwa nọ a re jo ru ewuhrẹ evaọ obọ Warwick. Inievo nọ e rrọ uviuwou Ebẹtẹle United States na kpobi a gaviezọ kẹ ovuẹ na eva iwou rai. Yọ dede nọ umutho inievo jọ ọvo a te re emu owọwọ na, ẹko-iruo Bethel Office a ru ọruẹrẹfihotọ re inievo nọ e rrọ uviuwou Ebẹtẹle na kpobi a wo ebrẹdi gbe enwaene na.
Inievo jọ nọ e rrọ Ebẹtẹle a sae jọ itanẹte rọ ividio thuru kugbe ukoko rai ru Ekareghẹhọ na re. Yọ edhere ọvo nana ejọ nọ e rrọ ekpako ukoko, a rọ kẹ ovuẹ Ekareghẹhọ na.
Inievo uviuwou Ebẹtẹle na buobu a ta nọ Ekareghẹhọ ukpe nana, yọ Ekareghẹhọ nọ o rẹ thọrọ ae ẹro ho. Dede nọ a sai kuomagbe ibe egegagọ rai evaọ oria ọvona ha, a rọ okugbe ọvo ru Ekareghẹhọ uwhu Jesu na evaọ akpọ na soso, onọ a ro dhesẹ edẹro kẹ uyoyou nọ Ọghẹnẹ mai, Jihova gbe Ọmọ riẹ, Jesu Kristi, a dhesẹ kẹ omai.—Jọn 3:16; Matiu 20:28.