Ẹyao COVID-19 na ọ be lẹliẹ uye bẹ ahwo buobu evaọ akpọ na soso. Rekọ evaọ etoke Ekareghẹhọ na, Isẹri Jihova a daoma gaga re a ta usi uwoma vi epaọ anwẹdẹ. U te ru nọ ahwo buobu a bi ro kpohọ oria itanẹte jw.org mai vi epaọ anwẹdẹ re a sae ruẹ evuẹ nọ i no Ebaibol na ze nọ e rẹ kẹ ae omosasọ, a vẹ jẹ riẹ eware nọ e be via wariẹ akpọ na họ. Evaọ amara Asa, ahwo nọ a kpohọ oria itanẹte mai na a bu vrẹ ahwo nọ i kpohọ iẹe evaọ amara Ava akuava, yọ ahwo nọ a yare nọ a wuhrẹ Ebaibol kugbe ai a bu vi epaọ anwẹdẹ.

Nọ umuo oke nọ ẹyao COVID-19 na o ro duwu lahwe ahwo nọ a bi kpohọ oria itanẹte mai na a bi ro dhe ebuebu na. Evaọ amara Ava, ahwo nọ a je kpohọ oria itanẹte na kẹdẹ kẹdẹ a bu te oware wọhọ ima ivẹ (2,000,000), yọ ere o be hae jọ vẹre. Rekọ evaọ amara Asa, ahwo nọ a je kpohọ iẹe kẹdẹ kẹdẹ a bu vrẹ ima esa (3,000,000), yọ evaọ ẹdẹ nọ a fi iyẹrẹ ekpokpọ họ iẹe kpahe ẹyao coronavirus na, ahwo na a re bu vrẹ ima ene gbe idu egba isoi (4,500,000). Evaọ Ane 7, 2020, nọ o jọ ẹdẹ Ekareghẹhọ na, ahwo nọ a kpohọ oria itanẹte mai na a bu vrẹ ima ihrẹ (7,000,000), yọ isase okpẹdẹ obọdẹ na gbe ovuẹ Ekareghẹhọ na oye ibuobu ahwo nana a rri.

Brọda Clive Martin yọ ọsẹro ẹko-iruo nọ a re se MEPS Programming Department nọ o rrọ obọ Ehri Ukoko Isẹri Jihova nọ o rrọ Warwick, evaọ New York. Ọ ta nọ: “Kukpe kukpe, etoke nana yọ okenọ ahwo buobu a re ro kpohọ oria itanẹte mai na re a sae riẹ oke gbe eria sa-sa nọ a te jọ ru Ekareghẹhọ na. Evaọ enukpe nana, fikinọ ma riẹ nọ ahwo buobu nọ a gwọlọ kpohọ Ekareghẹhọ na a te sai kuomagbe inievo na ha, ma te fi ovuẹ obọdẹ orọ 2020 gbe ovuẹ Ekareghẹhọ na họ oria itanẹte mai na evaọ evẹrẹ nọ i bu vi egba isoi (500). Ima ahwo buobu a rri hayo danlodu ividio ivẹ nana. Oria itanẹte jw.org mai nọ ahwo buobu a bi kpohọ evaọ oke nana nọ ẹyao na ọ rọ rrọ otọ na, u dhesẹ epanọ oria nana u bi fiobọhọ kẹ ahwo wuhrẹ ẹme Ọghẹnẹ je wo omosasọ te, te Isẹri Jihova gbe amọfa.”

Ahwo buobu nọ a bi kpohọ oria itanẹte mai na a rẹ gwọlọ evuẹ nọ e ta kpahe epanọ a sae rọ rẹrote oma rai gbe eware nọ a re ru re a seba ẹmọ, jegbe oware nọ a rẹ sai ru nọ a tẹ be ruawa. U te no ere no, ahwo buobu a be jariẹ gwọlọ evuẹ Ebaibol nọ e ta kpahe oka edẹ urere na gbe edhẹ-enyenya ene nọ a fodẹ evaọ obe Eviavia uzou avọ ezeza na.

Oware ofa jọ nọ ma muẹrohọ họ, ahwo nọ a be jọ oria itanẹte mai na yare uwuhrẹ Ebaibol kẹdẹ kẹdẹ a bu vi epaọ anwẹdẹ no. Wọhọ oriruo, enwenọ ahwo egba ivẹ gbe udhuvẹ-gbikpe (250) a be hae yare uwuhrẹ Ebaibol kẹdẹ kẹdẹ anwẹdẹ. Rekọ evaọ amara Asa, ahwo nọ a be yare kẹdẹ kẹdẹ a te bu te oware wọhọ egba esa gbe udhuvẹ-gbikpe (350), koyehọ enwenọ ahwo idu ikpegbọvo (11,000) evaọ amara na soso. Evaọ ẹdẹ nọ a re no no re a te te ẹdẹ Ekareghẹhọ na, gbe okioke riẹ, ahwo nọ a yare uwuhrẹ Ebaibol a bu vrẹ odu ọvo (1,000).

Jesu ọ ta nọ ahwo nọ a riẹ nọ u fo re a riẹ Ọghẹnẹ a ti wo evawere. (Matiu 5:3) Eva e be were omai gaga inọ evaọ oke obẹbẹ nana, ahwo a be dhẹ bru Jihova gbe ukoko riẹ ze re a fiobọhọ kẹ ai wo omosasọ nọ u re no Ẹme Ọghẹnẹ ze.—2 Ahwo Kọrint 1:3, 4.