Okokohọ ubrotọ 2020 “Hae Ghọghọ Ẹsikpobi”! na yọ okokohọ jọ nọ u wo ohẹriẹ gaga evaọ usu ikokohọ kpobi nọ Isẹri Jihova a ru no evaọ oke mai nana. A fa okokohọ na fihọ evẹrẹ nọ i bu vi egba isoi (500) nọ ahwo a rri evaọ obọ iwou rai. Efefafa na a sai ru iruo rai dede nọ a wo eware nọ a re ro ru iruo na gbe oke tere he.

Oniọvo jọ evaọ usu ahwo nọ a be fa ẹvẹrẹ Kikuyu evaọ Kenya ọ ta nọ: “Fikinọ ahwo a gbẹ be nyaziọ uwou ogha na ti ru iruo obọnana ha fiki ẹyao COVID-19 na, umutho ahwo ọvo ma wo nọ a rẹ sai rekọdo ividio na. Rekọ ma sai fi ẹbẹbẹ nana kparobọ keme ma rehọ inievo na ru iruo nana evaọ obọ iwou rai. Eva e were omai gaga nọ ma ruẹ epanọ ẹzi Jihova o ro fiobọhọ evaọ iruo nana.”

Ebẹbẹ itieye evona utu efafa Ẹvẹrẹ Obọ rọ T’ẹme Korea gbe utu efafa ẹvẹrẹ Korea a rẹriẹ ovao dhe re. Inievo nọ e jẹ hai no obọ iwou rai ziọ Ebẹtẹle ti fiobọhọ kẹ ai rekọdo a gbẹ jẹ nyaze he fiki ẹyao COVID-19 na.

Re a sai fi ebẹbẹ nana kparobọ, inievo na a te ru istudio fihọ obọ iwou rai. Inievo efa nọ a gbẹ rrọ okegbe a rehọ ekwakwa buobu nọ a gwọlọ rọkẹ irekọdini na ze. U te no ere no, fikinọ a siọ ikokohọ okogho kpobi nọ a ma omaa rai vẹrẹ ba, uwou ogha na o sae rehọ ekamẹra jọ nọ e rrọ Egwa Ikokohọ ro rekọdo okokohọ na fihọ ẹvẹrẹ obọ rọ t’ẹme.

Evaọ Venezuela, efefafa jọ a wo emamọ Itanẹte he. Efa a wo emamọ ekwakwa nọ a re ro rekọdo ho. Rekọ efefafa na a gbẹ idhere sa-sa nọ a sai ro ru iruo na. Wọhọ oriruo, efefafa nọ e rrọ oria jọ a rehọ ifomu nọ a re kiẹzẹ ro bru eria nọ edo ọ rẹ sai no ze dhe evaọ oke irekọdini.

Evaọ Juba nọ ọ rrọ South Sudan, u wo utu efefafa jọ nọ e be fa ẹvẹrẹ Zande. Omọvo rai jọ ọ ta nọ: “Nọ me yo nọ ma ti rekọdo eme okokohọ na soso, mẹ tẹ ta kẹ oma mẹ nọ, ‘Ma sai ru ei hi! Ma sae rekọdo eme gbe ividio okokohọ na kpobi nọ i bu vrẹ 90 soso evaọ oware emerae ivẹ ọvo ho.’ Rekọ enẹna nọ mẹ ruẹ nọ ma ru iruo na re no na, u mu omẹ ẹro nọ oware ovo o riẹ hẹ nọ o rẹ sae whaha Jihova nọ o gbe ru oreva riẹ gba ha. Oghẹrẹ nọ Jihova o re ru eware u gbunu kẹhẹ!”—Matiu 19:26.

Okokohọ ubrotọ 2020 “Hae Ghọghọ Ẹsikpobi”! na yọ okẹ nọ u no obọ Jihova ze dẹẹ, “ọnọ o rrọ oreva riẹ inọ oghẹrẹ ahwo kpobi a wo esiwo je wo eriariẹ egbagba uzẹme na.”—1 Timoti 2:4.