AZIE 22, 2023
IYẸRẸ AKPỌ SOSO
Ovuẹ Uvie na U bi Te Eria nọ E Mai Thabọ Evaọ Ofẹ Ẹkpẹlobọ Ovatha-Ọre Canada gbe United States
Brọda Mark Sanderson nọ ọ be kẹ ovuẹ nọ a ro rovie Ọgwa Uvie na evaọ Iqaluit, Nunavut
Evaọ edẹ 20 amara Asoi, 2023, Brọda Mark Sanderson nọ ọ rrọ Utu Ẹruorote na, ọ kẹ ovuẹ nọ a je rovie Ọgwa Uvie ọkpokpọ nọ a bọ fihọ ẹwho Iqaluit nọ ọ rrọ Nunavut, evaọ Canada. Ahwo nọ a kokohọ Ọgwa Uvie na kẹ ovuẹ na a bu te udhuvẹ gbe ene, yọ ahwo nọ a rehọ ividio thuru kugbe Ọgwa Uvie na a bu te egba esa gbe udhone gbe eree (388). Ubrotọ Nunavut ọ rrọ ruaro gaga. A tẹ ma ae wariẹ, o theri te ikilomita ima ọvo, idu egba eree gbe ọgbagbihrẹ (1,837,000). Rekọ ahwo nọ a be rriae a kawo vi idu udhuvẹ (40,000). Ahwo na a te oware ovo ho nọ a tẹ rehọ ae wawo epanọ otọ na o rro te. Wọhọ epanọ ma niyẹrẹ riẹ no vẹre evaọ jw.org, inievo mai a nyaku ebẹbẹ buobu nọ a jẹ bọ Ọgwa Uvie nana. Isẹri Jihova nọ e kake nyaziọ oria nana te ta usi uwoma a wo udu keme ekpahe egaga e rrọ oria nana yọ ọ vọ avọ igbehru. Evaọ okenọ a jẹ rọ Ọgwa Uvie na mudhe, a ta ẹme kpahe ẹrọwọ inievo nana.
Ekwotọ nọ e rrọ ofẹ ẹkpẹlobọ ovatha-ọre Canada e rro te enwenọ abọvo otọ Canada soso, yọ ejọ họ Nunavut, Northwest Territories, gbe Yukon
Evaọ 1976, Sista Margaret Gallie ọ kwa no okpẹwho Montreal evaọ ubrotọ Quebec kpohọ ẹwho nọ a bi se Iqaluit enẹna evaọ Nunavut. Oria nọ ọ kwa kpohọ na o thabọ te ikilomita idu ivẹ gbe udhuvẹ gbe ikpegbivẹ (2,052). Ọye họ Osẹri Jihova ọsosuọ nọ ọ ta usi uwoma evaọ ubrotọ nana nọ ọ rrọ ruaro na. Uwhremu na evaọ ukpe yena, Brọda Hans Pintar, nọ ọ jọ ọsẹro okogho avọ aye riẹ Minerva, a te weze kpohọ ẹkwotọ na nyae tuduhọ Sista Gallie awọ evaọ oka soso, yọ a ta usi uwoma re.
Kẹsena evaọ ukpe 1983, utu Isẹri Jihova jọ a tẹ nyae ta usi uwoma evaọ Iqaluit. A daoma gaga re a fiobọhọ kẹ ahwo riẹ uzẹme na kpahe Ọghẹnẹ, yọ onana o wha riẹ ze nọ ahwo uviuwou jọ nọ a rrọ emotọ ẹwho na, a rọ nyaharo te epanọ a rọ họ-ame. Ikpe 20 nọ i lele i rie, Isẹri Jihova sa-sa a kpohọ ẹkwotọ na unuẹse buobu nyae ta usi uwoma kẹ ahwo. Evaọ 2008, a tẹ to utu họ evaọ Iqaluit. Taure ukpe 2010 o te ti te, yọ utu na u zihe ruọ ukoko no, yọ a je ru ewuhrẹ evaọ isukulu ẹwho na jọ. Eva e were inievo na gaga evaọ amara Akpe 2022 nọ a mu ewuhrẹ họ eru evaọ Ọgwa Uvie ọkpokpọ na.
Iwhowho-uvie nana a be ta usi uwoma evaọ ekwotọ nọ e rrọ ofẹ ẹkpẹlobọ ovatha-ọre Canada nọ e mai thabọ. Inievo nana a wo udu keme eria nana e rrọ dhedhẹ gaga yọ e vọ avọ igbehru
U te no ẹwho Iqaluit no, ekobaro obọdẹ avọ iwhowho-uvie efa a ta usi uwoma evaọ emewho sa-sa nọ e rrọ ubrotọ Nunavut. Brọda Joel Therrien avọ aye riẹ Cheryl, a jọ usu rai. A kwa kpohọ Baker Lake, onọ u thabọ te ikilomita odu ọvo gbe egba esa gbe udhegbizii (1,329) evaọ ofẹ ukiediwo-ọre Iqaluit. Brọda Therrien ọ ta nọ: “Dede nọ ẹkwotọ na ọ rrọ dhedhẹ, o thabọ gaga, yọ ohwo ọ rẹ raha ugho re o te ti te obei, u te oware nọ a rẹ rọ fiki riẹ ro kpohọ obei. Ma ruẹ vevẹ nọ Jihova ọ ghale omai, keme ahwo nọ a be rria Baker Lake a gaviezọ ziezi. Eva e were omai nọ ma ta usi uwoma kẹ ahwo na re a riẹ oware nọ Ọghẹnẹ ọ ta evaọ Ebaibol na.”
Brọda Joel Therrien avọ Joseph Utatnaq nọ a kpohọ Okokohọ Ologbo “Wo Odiri”! evaọ Winnipeg, Canada, evaọ Aria 25, 2023
Ọzae jọ nọ a re se Joseph Utatnaq nọ ọ be rria Baker Lake ọ gaviezọ ziezi kẹ ovuẹ Uvie na. Ọ rọwo nọ Brọda Therrien o wuhrẹ iẹe Ebaibol na, yọ ọ họ-ame evaọ 2021. Ma be ta ẹme na, Brọda Utatnaq ọvo họ owhowho-uvie nọ ọ be rria Baker Lake. Nọ o yo nọ a ti rovie Ọgwa Uvie ọkpokpọ nọ a bọ fihọ Iqaluit evaọ amara Asoi 2023, ọ daoma nya. Onana họ orọ ọsosuọ nọ o ro kuomagbe inievo efa evaọ Ọgwa Uvie. Ọ ta nọ: “Eva e were omẹ gaga nọ mẹ ruẹ Ọgwa Uvie ọkpokpọ nọ a bọ na, yọ onana u duobọte omẹ. Inievo buobu nọ i fiobọhọ bọ Ọgwa Uvie na a be rria ubrotọ na ha, yọ a re rria oria odhedhẹ otiọna ẹdẹvo ho. O rọ vevẹ nọ a you Jihova gbe erivẹ rai.”
Obọnana, inievo nọ i bu te ẹgba ọvo gbe udhosa gbe ikpegberee (178) ae a rrọ ikoko ene nọ e rrọ ekwotọ nọ e rrọ ofẹ ẹkpẹlobọ ovatha-ọre Canada nana. Ukoko ọvo jọ ọ rrọ Nunavut, ivẹ e rrọ Northwest Territories, yọ ọvo ọ rrọ Yukon. Ekwotọ nana e rro te enwenọ abọvo otọ Canada soso. Fiki igbehru gbe ekpahe egaga nọ e rrọ ofẹ ẹkpẹlobọ ovatha-ọre Canada nana, o rrọ bẹbẹ re a ta usi uwoma kẹ ahwo nọ a be rria eria nana nọ i thabọ gaga na. Ma yere inievo mai nọ i wo udu nọ a sae rọ fialoma ze re a ta usi uwoma evaọ eria nana nọ i siomano na.—Iruẹru Ikọ 1:8.
EKWOTỌ ALASKA EVAỌ U.S.A. NỌ I THABỌ GAGA
Uwoho nọ ọ rrọ obọze evaọ obehru: Ọgwa Uvie nọ ọ rrọ Haines, Alaska. Uwoho nọ ọ rrọ obọze evaọ obotọ: Inievo nọ e rrọ ukoko Haines a bi ru ewuhrẹ evaọ Ọgwa Uvie ọkpokpọ rai
Alaska họ ubrotọ nọ o mae rro evaọ United States. A tẹ ma ae wariẹ, o theri te oware wọhọ ikilomita ima ọvo, idu egba ihrẹ gbe udhegbesa (1,723,000), koyehọ o rehọ akuava rro vi ubrotọ Texas evaọ United States. Ahwo nọ a be rria Alaska a bu te oware wọhọ idu egba ihrẹ gbe ọgba (730,000). Ovuẹ Uvie na o kaki te Alaska evaọ 1897, yọ iwhowho-uvie nọ e be ta usi uwoma evaọ ubrotọ na enẹna a bu te oware wọhọ idu ivẹ gbe egba ene (2,400). Iwhowho-uvie nana a rrọ ikoko ọgba gbe itu eree. Okpẹwho nọ o mae rro evaọ ubrotọ Alaska họ Anchorage. Ikoko ikpe gbe itu isoi eye e rrọ okpẹwho na. Usu evẹrẹ jọ nọ a bi ro ru ewuhrẹ họ Hmong (White), Korea, Russia, Samoa, gbe ẹvẹrẹ Central Alaskan Yupik nọ emotọ a rẹ ta. Ikpewho efa wọhọ Fairbanks, Juneau, gbe Wasilla i wo ikoko gbe itu evaọ evẹrẹ sa-sa. Ofariẹ, a be ta usi uwoma na te eria nọ i siomano gbe emewho esese nọ e rrọ Bethel, Wrangell, gbe Haines.
Brọda Kenneth Cook, Jr. ọ be kẹ ovuẹ nọ a ro rovie Ọgwa Uvie Haines, Alaska
Evaọ Aria 2014, a te vi ekobaro obọdẹ ivẹ jọ kpohọ ẹwho Haines. Edẹ rai họ Brọda Sebabi Leballo gbe Dustin Watson. Ẹwho na ọ rehọ oware wọhọ ikilomita egba eree gbe udhegbisoi (825) thabọ no okpẹwho Anchorage evaọ ofẹ ẹkpẹlobọ obọze ovatha-ọre. Evaọ ukpe ọvo yena, ahwo nọ a je wuhrẹ Ebaibol evaọ ẹwho na a bu te udhuvẹ. Ahwo nana jọ a nyaharo te epanọ a rọ họ-ame. Taure ukpe 2018 o te ti te, yọ a to ukoko ọsese jọ họ no evaọ ẹwho Haines, yọ a je ru ewuhrẹ evaọ oria nọ a re fi ebe họ evaọ ẹwho na. Evaọ 2021, a tẹ dẹ uwou jọ, a tẹ ruẹrẹ iẹe re ọ jọ Ọgwa Uvie. Uwhremu na, evaọ Azie 2022, Brọda Kenneth Cook, Jr. nọ ọ rrọ Utu Ẹruorote na ọ tẹ kẹ ovuẹ nọ a ro rovie Ọgwa Uvie na. Ahwo nọ a kokohọ Ọgwa Uvie na a bu te udhuvẹ gbe eree, yọ ahwo nọ a rọ ividio thuru re a gaviezọ kẹ ovuẹ na a bu te udhone gbe ezeza. Enẹna, iwhowho-uvie udhegbọvo ae a rrọ ukoko na, yọ a be ta usi uwoma evaọ ẹwho Haines gbe eria efa nọ i thabọ.
Brọda Dustin Watson (ẹkpẹlobọ) avọ Sebabi Leballo (obọze) okenọ a kwa ziọ Haines evaọ Alaska obọ, evaọ 2014
Brọda Leballo ọ jọ usu ahwo nọ a kokohọ Ọgwa Uvie Haines na nọ a je rovie ei evaọ 2022. Ọ ta nọ: “Nọ mẹ ziọ ẹwho na evaọ ikpe eree nọ e vrẹ, ohwo jọ ọ tẹ vuẹ omẹ nọ ukoko gbe Ọgwa Uvie ọ te jọ ẹwho na nẹnẹ, mẹ rẹ vro. Eva e were omẹ gaga nọ makọ evaọ eria nọ i thabọ, Jihova o bi fiobọhọ kẹ ‘oghẹrẹ ahwo kpobi’ re a sai wuhrẹ kpahe iẹe.”—1 Timoti 2:4.
