Utu Ẹruorote Isẹri Jihova u bi muẹrohọ oghẹrẹ nọ eware e be nya fiki okpẹyao nana nọ ọ rrọ otọ na nọ a bi se Coronavirus hayo COVID-19. Eruẹaruẹ nọ e rrọ Ebaibol i dhesẹ nọ evaọ oke urere, ikpeyao e te romavia. (Luk 21:11) Nọ okpẹyao o te bi vo, ohwo nọ o wo areghẹ ọ rẹ yọroma re o gbe wo ẹyao na ha, hayo ru oware nọ o re ro vo ruọ amọfa ha.—Itẹ 22:3.

Inievo mai buobu a be ruawa kpahe inievo mai nọ e rrọ eria nọ ẹyao na o bi jo vo gaga na. Fiki ẹyao COVID-19 nọ o bi vo na, a nwene oghẹrẹ nọ a bi ru eware buobu no evaọ iwou ogha gbe ikoko sa-sa nọ e rrọ Italy, Japan, South Korea gbe erẹwho efa. U tube te epanọ iwou ogha jọ a rọ ta nọ ahwo a gbẹ nyaziọ iwou ogha na ti rri ughe he, hayo nyaze te ruẹ ahwo rai hi. Iwou ogha jọ dede a tubẹ ta nọ inievo na a gbe kokohọ ru ikokohọ họ fiki uzi nọ egọmeti jọ a fihọ inọ ahwo buobu a gbe kokohọ oria ọvo ho. U te no ere no, inievo na a gbe bi kpohọ iwou ahwo nyae ta usi uwoma ha, hayo kpobọ Ọgwa Uvie nyai ru iwuhrẹ hẹ. Ghelọ ebẹbẹ nana kpobi na, inievo na a gbe bi wuhrẹ ẹme Ọghẹnẹ jẹ tuduhọ ohwohwo awọ.—Jud 20, 21.

Eware nọ ma be te ta kpahe na i fiobọhọ kẹ inievo buobu no, yọ e rẹ sai fiobọhọ kẹ owhẹ avọ uviuwou ra re otẹrọnọ ẹyao na o bi vo evaọ oria nọ whọ be rria.

• Whọ Ruawa Ga Hrọ Họ. Nọ okpẹyao o te bi vo, o roja gaga re ma yọroma. Rekọ u fo ho re ma ruawa vrẹta fiki omoware kpobi nọ ma yo.—Itẹ 14:15; Aizaya 30:15.

• Ru Oware nọ Egọmeti A Ta. Evaọ eria buobu, egọmeti a fi izi jọ họ re ẹyao na ọ seba evo gaga. U fo re ma daoma riẹ oware nọ egọmeti ọ be ta, re ma je yoẹme.—Ahwo Rom 13:1.

• Orufuọ. U wuzou gaga re whọ hae rehọ odha avọ ame wozẹ abọ ra kẹse kẹse, hayo rehọ oware nọ a re ro wholo abọ nọ o rẹ whaha ẹyao ro wholo abọ ra ẹsikpobi. U te no ere no, joma hai ririe eria nọ ahwo a rẹ rọ abọ te kẹse kẹse evaọ iwou mai gbe obọ Ọgwa Uvie. Edọkita a tẹ jẹ ta nọ jọ a gbẹ so ahwo obọ họ, keme onana o rẹ lẹliẹ ẹyao vo. Ukoko World Health Organization o tẹ jẹ fodẹ eware efa nọ ahwo a re ru re ẹyao coronavirus na ọ seba evo gaga.

• Ru Oware nọ U Dhesẹ nọ Who You Amọfa. Ginọ uzẹme inọ ewuhrẹ nọ ma rẹ nya gbe usi uwoma ota e roja gaga kẹ omai. Rekọ otẹrọnọ whọ be mọ, u ti woma re whọ jọ obọ uwou re ẹyao na o gbe vo ruọ amọfa ha. Ma te ru ere, u re dhesẹ nọ ma you inievo mai gbe amọfa nọ a be rria kẹle omai.—Matiu 22:39.

• Lele Oware nọ Ukoko na O Ta nọ Ma Ru. Ẹsejọ nọ ẹyao o te bi vo, uwou ogha o rẹ sae ta nọ inievo na a gbe kokohọ evaọ Ọgwa Uvie he, te Ọgwa Okokohọ gbe eria efa nọ ahwo a rẹ jọ kokohọ buobu. Ere o rrọ obọnana evaọ eria jọ obọ Italy, Japan, gbe South Korea nọ ẹyao COVID-19 na o bi jo vo gaga. O tẹ lọhọ, ekpako ukoko a sai fiobọhọ kẹ inievo na wo iwuhrẹ nọ a rekọdo no, re a kporo ai evaọ obọ uwou rai. Iwhowho-uvie a sae jẹ rehọ ifonu ta usi uwoma, vi uwou se ahwo, hayo kere ileta.

Whọ te jọ emagazini nọ ma fodẹ evaọ etenẹ na ruẹ eware efa nọ e rẹ sai fiobọhọ kẹ omai whaha ẹyao.

• “Protect Yourself From Disease” Awake! No. 6 2016, ẹwẹ-obe avọ 4-6

• “Ways to Improve Your Health” Awake! June 2015, ẹwẹ-obe avọ 2-7

• “You Can Improve Your Health: Key 4—Protect Your Health” Awake! March 2011, ẹwẹ-obe avọ 7