No edẹ 20 Asoi rite edẹ 11 Azeza, 2023, a fa ebọro FIFA U-20 World Cup evaọ ikpewho ene jọ evaọ Argentina. A fa ebọro na eka esa soso, yọ a ta nọ ahwo orẹwho na gbe ahwo nọ a no erẹwho efa ze ti rri ughe ebọro na a bu vi idu egba ene (400,000). Evaọ oke sa-sa, a fi ebe mai họ eware nọ a re ghelie, a te fi ae họ eria sa-sa. Inievo-emezae gbe erọ emetẹ nọ i wobọ evaọ usi uwoma ota ẹgbede na i bu te oware wọhọ egba isoi (500), yọ ebe nọ a kẹ ahwo i bu vi egba isoi (500). A dhesẹ oria itanẹte mai jw.org kẹ ahwo buobu re o fiobọhọ kẹ ae ruẹ iyo kẹ enọ rai.

Ọzae ẹwho na jọ ọ wẹriẹ ziọ oria ebe mai nọ inievo mai a dikihẹ, ọ tẹ ta nọ o rẹ were iẹe re ọ gaviezọ kẹ eware nọ a rekọdo no oke kpobi nọ o te bi ru oma riẹ jaja. Oniọvo-ọmọzae mai jọ o te dhesẹ oria itanẹte mai jw.org kẹe, ọ tẹ vuẹe kpahe epanọ ọ sae rọ danlodu ebe mai nọ a rekọdo no. Ọzae na ọ tẹ ta nọ o ti fi ebe mai họ usu eware nọ ọ te hae gaviezọ kẹ.

Re inievo mai a sae ta usi uwoma kẹ ahwo nọ a no erẹwho efa ziọ ugheriwo na, a fi ebe mai evaọ evẹrẹ izii họ eware nọ a re ghelie. Ofariẹ iwhowho-uvie buobu a wuhrẹ epanọ a re yere ahwo evaọ evẹrẹ sa-sa, re a sai lele ahwo nọ a wẹriẹ ziọ oria nọ a fi ebe mai họ ta ẹme. Oniọvo-ọmọzae mai jọ nọ o wobọ evaọ usi uwoma ota na ọ ta nọ: “Ma daoma gaga re ma ruẹ nọ ma ta usi uwoma kẹ ahwo nọ a no erẹwho sa-sa ze. Onana u dhesẹ kẹ omẹ nọ Jihova ọ rrọ wowou yọ o wo ọriẹwẹ hẹ. Eva e were omẹ nọ mẹ jọ usu ahwo nọ a ta usi uwoma ẹgbede na.”

Eva e were omai nọ ahwo nọ a wuzou eria nọ a jọ fa ebọro na a kẹ Isẹri Jihova uvẹ re a fi eware nọ a re ghelie nọ a fi ebe mai họ na fihọ eria nọ a rẹ kuvẹ riẹ hẹ vẹre fiki ozighi. Ohwo jọ nọ ọ rrọ usu ahwo nọ a wuzou oria na ọ ta oware nọ a rọ kẹ Isẹri Jihova uvẹ inọ, “Ma riẹ nọ Isẹri Jihova a rrọ dhedhẹ, a re ru ozighi hi.” Onana o wha riẹ ze nọ a rọ ta usi uwoma kẹ ahwo nọ a bi rou oria na.

Evaọ akpọ na soso, idibo Jihova a be daoma ta usi uwoma kẹ oghẹrẹ ahwo kpobi, re a ruẹ nọ a kọ ibi Uvie na fihọ udu ahwo.—Ọtausiuwoma Na 11:6.