Evaọ edhọ ivẹ jọ nọ a tu se ogbẹgwae Ukoko Okugbe Erẹwho nọ a re se UN Human Rights Committee, ogbẹgwae na u bruoziẹ kẹ Isẹri Jihova jọ nọ e rrọ Azerbaijan evaọ Akpegbivẹ 15, 2020. Edhọ ivẹ nana erọ inievo mai jọ avọ orẹwho Azerbaijan (Rahima Huseynova v. Azerbaijan; gbe Saladdin Mammadov, Rashad Niftaliyev and Sadagat Abbasova v. Azerbaijan). Ogbẹgwae na o ta nọ evaọ edhọ ivẹ nana, orẹwho Azerbaijan u kienyẹ Isẹri Jihova keme ohwo-akpọ kpobi o wo udu nọ o re ro ru oware nọ a rọ fiki riẹ mu ai na. Ogbẹgwae na o tẹ jẹ ta nọ jọ egọmeti Azerbaijan a nwene izi orẹwho rai na re oware utiona o gbẹ via ofa ha.

Oware nọ o wha ẹdhọ Sista Rahima Huseynova avọ Azerbaijan na ze họ, evaọ Akpegbivẹ 2014, iporisi i mu Sista Rahima Huseynova evaọ oria nọ a re se Baku inọ ọ nyae ta usi uwoma keleme. Kẹsena okọto ubrotọ na u te ho oniọvo na igho orẹwho na nọ i bu te 1,500 Manats (edọla 882). Okọto na o ta evaọ oke yena nọ Isẹri Jihova nọ e rrọ Baku a rrọ usu egagọ nọ i fi odẹ hotọ evaọ obọ egọmeti hi. * Nọ oniọvo na ọ wariẹ tu ẹdhọ na kẹ okọto ulogbo evaọ ubrotọ na, a tẹ ta nọ oziẹ ọsosuọ nọ a bru na oye a suobọhọ. Sista Huseynova ọ tẹ tubẹ wariẹ tu ẹdhọ na kpohọ okọto ulogbo nọ u re bruoziẹ edhọ nọ i no erẹwho sa-sa ze.

Ogbẹgwae Ukoko Okugbe Erẹwho na u te bruoziẹ inọ orẹwho Azerbaijan u kie uzi jọ evaọ usu izi nọ erẹwho sa-sa a rọwo fihọ inọ a re lele. Uzi na o rrọ Article 18(1) ọrọ ọtamuo erẹwho sa-sa nọ a re se International Covenant on Civil and Political Rights (ICCPR). Ogbẹgwae na o ta nọ jọ orẹwho Azerbaijan o hwa unuigho nọ u fo kẹ oniọvo na. Oware jọ nọ o tubẹ were omai gaga họ, ogbẹgwae na a jọ obe nọ a re kere oziẹ kpobi nọ a bru fihọ ta nọ “o gba orẹwho Azerbaijan họ inọ a rẹ daoma kpobi re a ruẹ nọ oware utiona o rẹ gbẹ via ofa ha. A ve je nwene izi orẹwho rai sa-sa gbe oghẹrẹ nọ a be hai ru eware re a ruẹ nọ a kẹ ohwo kpobi uvẹ nọ o re ro ru eware kpobi nọ a fodẹ evaọ article 18 ọrọ ọtamuo ICCPR na.”

Yọ oware nọ o wha ẹdhọ inievo esa na avọ orẹwho Azerbaijan ze họ, inievo jọ a be hai kokohọ wuhrẹ Ebaibol evaọ uwou Brọda Saladdin Mammadov. Kẹsena evaọ Akpe 2014, iporisi a tẹ vẹruọ uwou na. A kiẹ oria kpobi evaọ uwou na, a tẹ kwa Ebaibol gbe eware efa kpobọ ogba iporisi. A te je mu Brọda Mammadov, Brọda Rashad Niftaliyev, gbe Sista Sadagat Abbasova. A jọ obọ ogba iporisi vrẹ euwa ezeza. Nọ edẹ ivẹ e vrẹ no, a te se ai kpohọ okọto ubrotọ na nọ a re se Ganja City Nizami District Court. Okọto na u te bruoziẹ inọ a thọ uzi egọmeti fiki ewuhrẹ na nọ a ru na. Anọ ahwo egagọ rai a fi odẹ hotọ họ evaọ ẹwho Ganja. Okọto na u te ho inievo mai na omomọvo igho Azerbaijan nọ i bu te 2,000 Manats (edọla 1,176). Inievo esa na a tẹ wariẹ tu ẹdhọ na kpohọ okọto ukpehru evaọ orẹwho na. Rekọ okọto yena o tẹ whobọhọ oziẹ ọsosuọ na. O kẹ uye kẹhẹ! Kẹsena inievo na a te tu ẹdhọ na kpohọ ogbẹgwae nọ a re se UN Human Rights Committee.

Nọ ogbẹgwae na u rri ẹme na, o tẹ ruẹ nọ orẹwho Azerbaijan o la vrẹ izi buobu nọ e rrọ ọtamuo ICCPR nọ ae erẹwho buobu a rọwo fihọ na. Ogbẹgwae na o tẹ ta nọ jọ a hwa igho kẹ Isẹri Jihova esa na. U wo ẹme jọ nọ o wuzou gaga nọ ogbẹgwae na o ta, nọ a tube kere fihọ obe nọ a re kere oziẹ kpobi nọ a bru fihọ kẹ ahwo kpobi se. A ta nọ, “okọto nọ u bruoziẹ ọsosuọ na o tubẹ vuẹ Isẹri Jihova oware nọ u ro fo re a fi odẹ hotọ evaọ obọ egọmeti hi taure a tẹ te jọ uwou ohwo ru eware egagọ rai evaọ ẹwho na.” Ẹme nọ ogbẹgwae na o ta u dhesẹ nọ inievo mai nọ e rrọ Azerbaijan a wo udu nọ a re ro kokohọ re a gọ Ọghẹnẹ rai ababọ odẹ nọ a re fihotọ evaọ obọ egọmeti.

Enwenọ ẹme ọvona ogbẹgwae na o ta evaọ ẹdhọ Sista Rahima Huseynova na. A tẹ jẹ ta nọ jọ egọmeti Azerbaijan o “nwene izi orẹwho rai sa-sa gbe oghẹrẹ nọ a be hai ru eware” re a ruẹ nọ a kẹ ahwo rai uvẹ ru eware kpobi nọ e rrọ ọtamuo ICCPR na.

Ma bi yere Ọghẹnẹ gaga inọ anwọ imikpe jọ ze na, eware i nwene ziezi no evaọ orẹwho Azerbaijan, yọ a be kẹ Isẹri Jihova uvẹ ru eware egagọ rai enẹna. Ma lẹ nọ jọ iziẹ ivẹ nana nọ a bru na e jọ usu eware nọ e rẹ lẹliẹ iruo usi uwoma na dikihẹ evaọ orẹwho Azerbaijan.​—Ahwo Filipai 1:7.