Evaọ Azie 24, 2020, okọto nọ a re se European Court of Human Rights (ECHR) u bruoziẹ edhọ ivẹ jọ nọ i wuzou gaga kẹ Isẹri Jihova nọ e rrọ Azerbaijan. Ẹdhọ ọsosuọ nọ a bruoziẹ riẹ họ onọ o jọ udevie oniọvo mai Valiyev gbe inievo efa jọ avọ Azerbaijan. Ọrọ avivẹ kọ onọ a se Religious Community of Jehovah’s Witnesses (Egagọ Isẹri Jihova) avọ Azerbaijan. Iziẹ nana nọ okọto na u bru na o kẹ Isẹri Jihova nọ e rrọ Azerbaijan udu nọ a re ro ru iruẹru egagọ rai ababọ ukpokpoma.

Evaọ edhọ ivẹ nana, egọmeti Azerbaijan ọ rọwo nọ a gine ru inievo mai na thọ keme a je kpokpo ai. Egọmeti na ọ tẹ jẹ ta nọ ọ te hwa ugho nọ u bu vrẹ enaera ima eree gbe idu egba isoi (8,500,000) kẹ inievo na. Iziẹ ivẹ nana nọ okọto ECHR u bru na i dhesẹ nọ a rọwo fihọ ẹme nọ egọmeti Azerbaijan ọ ta na.

A tu ẹdhọ nọ ọ jọ udevie Valiyev gbe inievo efa jọ avọ Azerbaijan na kpohọ okọto ECHR na evaọ ukpe 2011, yọ u kiekpahe inievo mai nọ e rrọ okpẹwho Ganja evaọ Azerbaijan. Anwọ ikpe buobu ze na, egọmeti nọ e rrọ Ganja a be rọwo nọ inievo mai na a kere odẹ egagọ mai fihotọ evaọ obọ egọmeti hi. U te ru nọ iporisi a be hai ro kpokpo inievo mai evaọ okenọ a te bi ru ewuhrẹ, a ve mu ohwo kpobi nọ ọ rrọ etẹe. Kẹsena a ve ho ejọ evaọ usu ahwo nọ a mu na igho buobu. U wo oniọvo-ọmọzae jọ nọ a bruoziẹ kpe je ho unuẹse buobu. Yọ a te ku igho nọ oniọvo nana ọ rọ hwa eho kpobi kugbe i bu vrẹ enaera ima ene (4,000,000) evaọ oke yena. A tube mu inievo-emezae gbe erọ emetẹ jọ dede keme a sae hwa eho nọ a ho rai hi fiki epanọ igho na i bu te.

Ukpe 2013 inievo na a ro tu ẹdhọ avivẹ na kpohọ okọto ECHR na fikinọ egọmeti Azerbaijan ọ ta nọ unu ebe mai jọ ọvo a rẹ kuvẹ nọ a wọ no orẹwho ofa se inievo na.

Dede nọ egọmeti ọ re rọwo nọ inievo na a kere odẹ egagọ rai fihotọ evaọ Ganja ha, eware i woma vi epaọ anwẹdẹ no. Wọhọ oriruo, anwọ ikpe jọ ze na, inievo mai a be hai kokohọ ekueko ru iwuhrẹ evaọ iwou inievo na sa-sa, yọ iporisi i gbe bi kpokpo ai hi. U te no ere no, dede nọ ahwo egọmeti a rẹ kiẹ ebe nọ a be wọ no orẹwho ofa ze riwi taure a tẹ te rọwo nọ a wọ ae se inievo na, a be kuvẹ re a wọ ebe buobu se ae enẹna.

Brọda Kiril Stepanov nọ o bi ru iruo kugbe ẹko-iruo nọ a re se Public Information Desk evaọ Azerbaijan ọ ta nọ: “Ma bi rẹro nọ iziẹ ivẹ nana nọ okọto ECHR u bru na u ti ru ei lọhọ nọ ma te rọ jọ Ganja gbe ikpewho efa evaọ Azerbaijan kere odẹ egagọ mai fihotọ evaọ obọ egọmeti. Ma te je bi rẹro nọ u te te oke jọ no, ahwo egọmeti a gbẹ te hae kiẹ ebe mai riwi re a tẹ te kuvẹ nọ a wọ ae se inievo na ha.”

Ma yere Jihova rọkẹ obufihọ riẹ. Iziẹ ivẹ nana nọ a bru kẹ inievo na yọ oware ofa nọ o kẹ omai imuẹro nọ ‘okwakwa ẹmo ọvo nọ a ru rọ wọso idibo Ọghẹnẹ nọ u ti wo iruo o rrọ họ.’—Aizaya 54:17.