Evaọ Ava 8 2017, Okọto nọ O Mai Kpehru evaọ Azerbaijan o kuenu kẹ Irina Zakharchenko avọ Valida Jabrayilova inọ a reabe he evaọ ẹdhọ nọ a rehọ e rai gu fiki ebe egagọ rai nọ a jẹ ghale ababọ uvẹ nọ egọmeti ọ kẹ rai. Obruoziẹ nọ a re se Hafiz Nasibov, omọvo Ogbẹgwae Edhọ Ahwo nọ E Raha Izi Egọmeti o whowho nọ Okọto na ọ ruẹ uzi ovuovo nọ eyae Isẹri Jihova ivẹ na a raha ha, fikiere a nwene oziẹ nọ okọto osese o bru na.

Nọ a je gu ẹdhọ na, eriẹ-izi nọ i dikihẹ kẹ Zakharchenko avọ Jabrayilova a dhesẹ vevẹ inọ egọmeti ọ raha uzi nọ o ro gboja kẹ eyae Isẹri Jihova ivẹ na ekueku evaọ eware nọ ahwo-akpọ kpobi a wo udu nọ a rẹ sai ro ru. Okọto na o kẹ eyae ivẹ na uvẹ re a gbiku eware nọ a thihakọ rai evaọ emerae 11 nọ a ro mu ai nọ a jẹ rọ hẹrẹ ẹdhọ nọ a te rehọ ae gu na, gbe epanọ onana u kpomahọ uzuazọ rai te.

Jason Wise, ọriẹ-izi nọ ọ rẹ sai guẹdhọ evaọ oria kpobi evaọ akpọ na nọ o re guẹdhọ eware nọ ahwo-akpọ a wo udu nọ a rẹ sai ro ru ọ ta nọ: “Eva e were omai inọ Ogbẹgwae nọ o re bruoziẹ Edhọ Ahwo nọ E Raha Izi evaọ Okọto nọ O Mai Kpehru na a nwene oziẹ nọ okọto osese o bru na. Rọkẹ Isẹri Jihova nọ e rrọ Azerbaijan, onana họ orọ ọsosuọ nọ a ro nwene oziẹ nọ okọto osese o bru evaọ eme itiena. Ma rẹro nọ Okọto ubrotọ Baku Sabail o ti vuhumu nọ oziẹ nana o gwọlọ nọ a rẹ hwa igho jọ kẹ eyae ivẹ nana fiki uye nọ a rọ bẹ ae na.”