Evaọ Edisoi-Oka, Ọvo 25, 2019, ọloho nọ a bọ brudhe evaọ oria nọ a rẹ jọ tọ eware eghaghae o kporo kuotọ evaọ ẹwho Brumadinho, nọ ọ rrọ ubrotọ Minas Gerais, evaọ Brazil. Onana o wha riẹ ze nọ ọloho o ro su ruọ oria kpobi. O tẹ kawo, ahwo nọ a bu te udhuhrẹ gbikpe (150) a whu, yọ a be gwọlọ ahwo nọ i bu te udhuzii gbe ivẹ (182) bẹ.

Ikoko Isẹri Jihova ivẹ e rrọ ẹwho Brumadinho, avọ iwhowho-uvie nọ i bu te udhuzii (180), yọ ibuobu rai a bi ru iruo evaọ ekọmpene nọ ọ rẹ tọ eware na. Inievo-emezae ikpe a je ru iruo evaọ okenọ oria nọ a bọ brudhe na o ro kporo kuotọ na. Dede nọ oware ovo u te inievo-emezae izii oma ha, a gbẹ be gwọlọ oniọvo-ọmọzae ọvo jọ nọ ọ rrọ ọkpako ukoko bẹ. Ofariẹ, o tẹ kawo, iviuwou Isẹri Jihova isoi a kwa no iwou rai, yọ ọloho na ọ raha uwou uviuwou jọ muotọ.

Omọvo Ogbẹgwae Uwou Ogha Brazil gbe esẹro okogho sa-sa a weze bru inievo mai nọ okpẹtu nana o te oma na, re a rehọ Ẹme Ọghẹnẹ tuduhọ ae awọ je fiobọhọ kẹ ae. Ma lẹ nọ Jihova Ọsẹ obọ odhiwu mai na ọ gbẹ hae sasa ae oma jẹ tha ae uke.—Ahwo Rom 15:5.