Anwọ Ọvo 18, 2020 ze, ikpiso e be rrọ gaga evaọ ibrotọ Espírito Santo avọ Minas Gerais evaọ obọ Brazil, onọ o wha riẹ ze nọ ame o ro ku eria kpobi jẹ raha eware. Ame na o su ruọ oko ẹwho, raha iwou, su imoto vrẹ, je vi ire no otọ dede. Ahwo egọmeti a ta nọ idu ahwo buobu a kwa no iwou rai, yọ ahwo nọ a whu a bu vi udhosa.

Evaọ ẹwho Iconha avọ Alfredo Chaves, ame na ọ raha iwou Isẹri Jihova izii, yọ inievo mai nọ a jẹ rria eva rai a bu te udhegbihrẹ. Rekọ eva e were omai inọ oniọvo mai ọvuọvo ọ nwoma ha yọ ọvuọvo o whu hu.

Isẹri Jihova nọ i bu te udhusoi (100) evaọ ubrotọ yena a fialoma via re a fiobọhọ kẹ inievo mai nọ ẹvo na ọ raha iwou rai na. Ekpako na a ru ọruẹrẹfihotọ nọ inievo mai a rọ zọhọ emuore, ame, gbe iwu ze rọkẹ inievo mai nọ okpẹtu o te oma na. A te je fiobọhọ ru orufuọ jẹ hwẹ ọloho no iwou inievo mai gbe amọfa nọ a rrọ Isẹri Jihova ha.

Oniọvo mai ọvuọvo ọ nwoma ha yọ ọvuọvo o whu hu. Ghele na, ame na ọ raha Egwa Uvie isoi, o te je le iviuwou 50 erọ inievo mai no iwou rai. Fikinọ ame na o je ku vẹrẹ gaga, o ko inievo mai jọ họ iwou rai. Fikiere a tẹ gadiẹ kpohọ edhe avivẹ iwou rai, yọ etẹe a jọ rehọ okọ wọ ae. Inievo mai kpobi nọ ame na o le na a kwa kpohọ iwou Isẹri Jihova efa.

A rọ Egbẹgwae Obufihọ kẹ Ahwo nọ Eware Okpẹtu E Via Kẹ mu no evaọ ubrotọ Espírito Santo avọ Minas Gerais re a rẹrote iruo obufihọ na. Egbẹgwae Obufihọ na avọ esẹro okogho gbe ekpako ukoko nọ e rrọ ibrotọ yena a bi ruiruo kugbe re a fiobọhọ kẹ inievo nọ okpẹtu o te oma jẹ rọ Ẹme Ọghẹnẹ sasa ae oma.

Ma te gbẹ lẹ roro inievo mai nọ ame o le jẹ raha iwou rai na. Ma yere Jihova nọ ọ be rọ kẹ ae ẹgba, sasa ae oma jẹ rọ inievo rai fiobọhọ kẹ ae.—Olezi 28:7.