Evaọ amara Ọvo 20, 2020, uviuwou Ebẹtẹle Cameroon o kwa kpohọ uwou ogha ọkpokpọ nọ a bọ fihọ Logbessou, nọ ọ rrọ ofẹ ẹkpẹlobọ ovatha-ọre okpẹwho Douala. Inievo-emezae gbe erọ emetẹ udhuvẹ gbe ikpegbizii a be rria uwou ogha na je bi ru iruo evaọ etẹe, yọ inievo udhosa gbe ikpegbọvo a re no obọ iwou rai ze ti ru iruo evaọ etẹe evaọ edẹ jọ.

Uwou ogha anwae Cameroon na ọ jọ oria nọ a re se Bonaberi evaọ ofẹ ukiediwo-ọre okpẹwho Douala. Egọmeti o fi awhaha họ iruẹru Isẹri Jihova evaọ Cameroon evaọ ikpe udhegbesa soso. Iwou jọ nọ inievo mai a ruẹrẹ evaọ okenọ a si awhaha na no otọ no evaọ ukpe 1993, eye a ro ru uwou ogha anwae na. Iwhowho-uvie nọ e jọ Cameroon gbe erẹwho efa nọ uwou ogha na o be rẹrote a bu te idu ikpegbizii gbe egba ivẹ gbe udhosa-gberee (19,268) evaọ ukpe 1993. Rekọ enẹna, a bu vi idu udhuvẹ gbe ikpegbivẹ (52,000) no, yọ a be fa ebe ukoko na fihọ evẹrẹ nọ i bu te udhegbizii. Onana o wha riẹ ze nọ ukoko na o rọ bọ uwou ogha ọkpokpọ na. a

A te bọ oria jọ fihọ uwou ogha na, onọ ahwo nọ a kpohọ ugheriwo a rẹ jọ rri ughe eware sa-sa, yọ a ti rovie ei taure ukpe 2020 u te ti re. A te jọ oria yena dhesẹ eware nọ a bi ru evaọ uwou ogha na gbe ikuigbe usi uwoma ota Isẹri Jihova evaọ Cameroon, Equatorial Guinea, gbe Gabon.

Brọda Stephen Attoh nọ ọ rrọ omọvo Ogbẹgwae Uwou Ogha Cameroon ọ ta nọ: “Nọ ma kwa kpohọ uwou ogha ọkpokpọ mai na, o jọ wọhọ oware ewezẹ kẹ omai. Ma gba riẹ mu nọ ma rẹ rọ ẹgba mai kpobi ru iruo kẹ Jihova evaọ emamọ oria nana. Jihova o ru ikpeware kẹ omai no; eva e be were omai fikiere ma bi jiri iei.”—Olezi 145:7.