Brọda Jean-Yves Mudaheranwa avọ aye riẹ Vasthie a rrọ usu ahwo nọ a bi fiobọhọ kẹ enọ i wo ẹyao coronavirus na evaọ Montreal, obọ Canada. Brọda Mudaheranwa yọ edọkita nọ ọ be jọ ẹsipito egọmeti ru iruo. Aye riẹ, Sista Mudaheranwa yọ enọso nọ o bi ru iruo evaọ ẹsipito nọ a bi jo siwi ahwo nọ a wo ẹyao COVID-19 na. Oke nana nọ ahwo a rrọ awawa na, Jihova o bi fiobọhọ kẹ inievo mai nana wo “evawere” wọhọ epanọ ọ ya eyaa riẹ.—Aizaya 65:14.

Brọda Mudaheranwa ọ ta nọ: “Ozọ o rrọ ahwo iruo mẹ buobu oma. Ozọ u ri mu ai te enẹ ẹdẹvo ho.” Sista Mudaheranwa ọ ta nọ: “Ebaibol nọ ma be hai wuhrẹ ẹsikpobi u bi fiobọhọ kẹ omai gaga. Ma be hai roro kpahe eware nọ Ebaibol na ọ ta nọ e te via evaọ edẹ urere na, jẹ kareghẹhọ nọ Jihova ọ rrọ kugbe omai. Ọ te nyasiọ omai ba ha. Olẹ u bi fiobọhọ gaga re. Taure me te ti no uwou kpohọ iruo, mẹ rẹ lẹ. Kẹsena udu u ve te omẹ otọ.”

Brọda Mudaheranwa ọ ta re inọ: “Mẹ ohwo Rwanda, yọ mẹ rọ ẹro ruẹ ẹmo nọ a fi evaọ orẹwho mẹ nọ a jọ kpe ahwo buobu. Oware utioye o re via ẹdẹvo ho evaọ obọ Canada obonẹ. Fikiere, ẹsejọ o rẹ thọrọ omai ẹro inọ edẹ urere na ma rrọ na. Re a ta uzẹme, orọnikọ ẹsikpobi o rẹ jọ omẹ oma nọ ẹdẹ Jihova ọ ginẹ kẹle no ho. Okpẹyao nana nọ ọ rrọ otọ na u ru nọ u ro mu omẹ ẹro ziezi inọ ginọ edẹ urere na ma rrọ na. U te je ru omẹ ruẹ vevẹ nọ Ebaibol ọ rẹ ta ọrue he, gbe nọ eruẹaruẹ Ebaibol e te seba erugba ha.”

Inievo buobu evaọ eria sa-sa akpọ na a rọwo fihọ ẹme nọ Brọda Mudaheranwa avọ aye riẹ a ta na. Ma ruẹ nọ udu u bi te omai otọ evaọ oke nana nọ ahwo a rrọ awawa na.—Aizaya 48:18.