No edẹ 19 rite 23 Aria, 2023, ikpiso e rrọ gaga evaọ ofẹ obọze ovatha-ọre Chile, yọ eria buobu i ku ame. O kẹ omai uye gaga nọ ame ọ wariẹ ku eria nana nọ inievo mai buobu a be rria na. Evaọ Azeza 2023, uye o bẹ inievo mai gaga keme ame o ku eria nana re. Iyẹrẹ i dhesẹ nọ anwọ ikpe ikpe nọ e vrẹ na, ukpe nana họ ukpe nọ oso ọ mae rrọ kpaobọ evaọ ubrotọ na. Fikinọ ame nọ ọ rrọ abade Pacific ọ be rrorro vi epanọ ọ jọ, yọ oghẹrẹ ofou jọ nọ ọ rẹ wha oso ze nọ a re se El Niño o bi fou gaga, onana o wha riẹ ze nọ oso ọ be rọ rrọ gaga jẹ lẹliẹ eria buobu ku ame. Enwenọ iwou idu udhegbisoi (25,000) e raha gaga hayo raha muotọ, yọ o tẹ kawo, imasa i whu no.

• Oniọvo mai ọvuọvo ọ nwoma hayo whu hu

• Iwhowho-uvie egba ivẹ gbe udhegbisoi (225) a kwa no iwou rai

• Iwou ikpegbesa e raha gaga

• Iwou ọgbagberee e raha omojọ

• Egwa Uvie esa gbe uwou oniọvo-ọmọzae jọ nọ a rẹ jọ ru ewuhrẹ e raha omojọ

• Esẹro Okogho gbe ekpako ukoko nọ e rrọ oria nọ oware na ọ jọ via na a be rọ Ẹme Ọghẹnẹ tuduhọ inievo na awọ je fiobọhọ kẹ ae

• A rehọ Egbẹgwae Ogbodhẹ ivẹ mu re a rẹrote iruo ogbodhẹ na

Ma be lẹ roro inievo mai nọ ame o ku eware rai evaọ Chile na, yọ ma bi rẹro okenọ eware okpẹtu e te gbẹ rọ via ha evaọ okenọ Uvie Ọghẹnẹ u te mu otọakpọ na họ esu no.—Aizaya 32:18.