Fiji

• Evaọ Edene-Oka, Akpegbivẹ 17, 2020, ofou-owhre ọgaga nọ a se Yasa o fou ruọ ukoliko avivẹ nọ o mae rro evaọ orẹwho Fiji nọ a re se Vanua Levu

• Ofou-owhre nana yọ orọ avivẹ nọ ọ mae ga nọ o fou no evaọ Fiji. A ta nọ oghẹrẹ nọ ofou na o ro fou a rẹ ruẹ unu gbiku riẹ hẹ

• Ikoko gbe itu esese nọ i bu te 30 eye e rrọ oria nọ oware na o jọ via na

• Oniọvo mai ọvuọvo ọ nwoma ha

• Iyẹrẹ nọ e kaki te omai obọ i dhesẹ nọ iviuwou 20 e dhẹ nọ iwou rai

• Ofou-owhre na ọ raha ekakọ gaga, o tẹ jẹ raha etọ nọ iwhowho-uvie nọ i bu te 430 a rẹ kọ eware fihọ

• Iwou 10 e raha muotọ

• Iwou 25 e raha gaga

• Ọgwa Uvie 1 ọ dina raha

• Uwou Ogha Fiji o rehọ Egbẹgwae Obufihọ kẹ Ahwo nọ Eware Okpẹtu E Via Kẹ esa mu, re i fiobọhọ kẹ inievo nọ e rrọ oria nọ oware na o jọ via ha. Egbẹgwae nana a fiobọhọ kẹ inievo na wo eware nọ a gwọlọ wọhọ, ame nọ a rẹ da, iwu, emuore, gbe etapolini nọ a sai ro ruru. U te no ere no, egbẹgwae nana a te je fiobọhọ kẹ inievo nọ e dhẹ no iwou rai re a ruẹ oria nọ a rẹ sae rria evaọ omoke jọ

• Inievo nọ Uwou Ogha Fiji u vi gbe esẹro okogho nọ e rrọ oria na a bi weze bru inievo na re a tuduhọ ae awọ

• Inievo nọ i bi fiobọhọ evaọ ogbodhẹ na gbe enọ i bi weze nyae tuduhọ ae awọ na kpobi a bi ru lele izi nọ a fihọ fiki ẹyao COVID-19 na

Dede nọ ofou-owhre nana ọ raha eware inievo mai na gaga, a be ruẹ epanọ eme nọ e rrọ Olezi 46:1 i bi ro rugba, onọ o ta nọ: “Ọghẹnẹ họ oria adhẹzọ mai.”