Evaọ amara Ane 2012, Vivienne Falcone nọ ọ rrọ ikpe ihrẹ ọ rehọ obe nọ ọsẹgboni riẹ o kere kpohọ ọfisi iprincipal rai re a sae kẹe uvẹ siọ isukulu ba evaọ ẹdẹ ọvo. Ahwo uviuwou na soso a gwọlọ kpohọ okokohọ ubrotọ edẹ esa ọrọ Isẹri Jihova evaọ Mainz. Enọ i wuzou isukulu na a rọwo nọ a rẹ kẹ Vivienne uvẹ siọ isukulu ba kpohọ okokohọ na evaọ Edisoi-Oka ha. Rekọ fikinọ ọsẹgboni Vivienne a gwọlọ nọ o wuhrẹ kpahe Ọghẹnẹ, a tẹ whae kpohọ okokohọ na dede nọ enọ i wuzou isukulu na a rọwo ho. Ọsẹgboni Vivienne a tẹ wọ ẹme na kpohọ oria nọ u wuzou iruẹru isukulu evaọ ubrotọ na nọ a re se State Board of Education (Board) inọ isukulu na e kẹ ọmọ na uvẹ hẹ. Ukpenọ a rehọ ẹdẹ okokohọ na wọhọ ẹdẹ egagọ, oria nọ u wuzou iruẹru isukulu o tẹ vuẹ ae nọ a rẹ hwa eho.

Oware nana nọ oria nọ u wuzou isukulu o ta na u ti kpomahọ ọsẹgboni Vivienne yoyoma keme evaọ uzi orẹwho Germany, nọ ọmọ ọ tẹ siọ isukulu ba yọ a kẹ riẹ uvẹ hẹ, a rẹ rehọ iẹe nọ ọsẹgboni na a be wọso uzi nọ o gba rai họ nọ a re vi ọmọ na kpohọ isukulu. Onana o rẹ whae ze nọ ohwo ọ rẹ rọ hwa eho hayo tube kpohọ ekarọ dede evaọ ẹsejọ. Rekọ nọ a rri ẹme ziezi, ọsẹgboni Vivienne a rehọ e riẹ nọ isukulu na o bi mi ae udu nọ a re ro kpohọ egagọ rai je wuhrẹ ọmọ rai kpahe iruẹru egagọ rai.

Ọsẹgboni Vivienne, Stefano avọ Elisa a te tu oria nọ u wuzou iruẹru isukulu na kpohọ okọto. A dhesẹ nọ iruẹru egagọ okpẹdoke yena i re fiobọhọ kẹ uviuwou na soso gọ Ọghẹnẹ kugbe jẹ bọ ẹrọwọ rai ga. A ta nọ: “Ikokohọ ubrotọ yọ obọdẹ etoke kẹ omai evaọ kukpe kukpe, o tẹ jẹ rrọ abọjọ iruẹru egagọ mai.” * Okọto na o bru kẹ ọsẹgboni na, a rọwo nọ ikokohọ ubrotọ ẹsiẹvo ẹgbukpe na yọ edẹ ehọlide iruẹru egagọ Isẹri Jihova. Enọ i wuzou isukulu na a tẹ wariẹ tu ẹdhọ na, be vro nọ ikokohọ ubrotọ Isẹri Jihova yọ edẹ ehọlide egagọ họ keme yọ etoke omaweromẹ gheghe, e wọhọ edẹ ọrẹri nọ ma riẹ wọhọ Kresimesi, Isita, hayo edẹ ehọlide orẹwho na ha.

Evaọ edẹ udhegbihrẹ amara Ahrẹ 2015, okọto ukpehru nọ a re se Higher Administrative Court of Hesse o tẹ whobọhọ oziẹ nọ okọto osese u bru no vẹre na. Okọto ukpehru na o ta nọ epanọ ẹdẹ jọ o wuzou kẹ egagọ jọ te oye ọvo a sai ro sei ẹdẹ ehọlide egagọ. Okọto na o ruẹ nọ ohẹriẹ ulogbo o rrọ eware egagọ gbe erọ egọmeti, o ta nọ: “Ogbẹrọ ere he, egọmeti o ve ti mi ahwo udu nọ uzi [koyehọ Uzi Germany] o kẹ rai nọ a sai ro kpohọ ichọche hayo egagọ, jiroro kẹ omobọ rai, je yere uzuazọ rai epanọ a gwọlọ. O gba [egọmeti] họ inọ ọ rẹ jọ abọ ọvo ho evaọ eware nọ ohwo ọvo ọ rẹ jọ jiroro kẹ omobọ riẹ hayo ẹme egagọ.”

Okọto ukpehru na o tẹ jẹ fodẹ oria evuẹ itanẹte Isẹri Jihova nọ u dhesẹ nọ edẹ ikokohọ ubrotọ Isẹri Jihova yọ edẹ ehọlide egagọ rai. Okọto na o tẹ jẹ ta nọ ẹse nọ enọ i wuzou isukulu a se nọ ọmọtẹ Falcone ọ rẹ sae siọ isukulu ba kpohọ okokohọ họ na “o wọso udu nọ ọmọ na o wo nọ ọ rẹ sai ro kpohọ egagọ nọ u je rie gbe udu nọ esẹgbini a wo nọ a rẹ sae rọ rehọ uruemu egagọ rai gbe eware nọ a roro nọ i kiehọ ro wuhrẹ emọ rai.” Okọto na o te ku ei họ nọ oria nọ u wuzou iruẹru isukulu na o “wọso oware nọ egọmeti ọ gwọlọ inọ a re dhomahọ ẹme egagọ họ.”

Nọ okọto na u bruoziẹ kẹ ọsẹgboni Vivienne no, a tẹ ta nọ: “Mai Isẹri Jihova ma se isukulu gboja gaga yọ ma rẹ kọ isiuru obe-uwuhrẹ họ udu emọ mai. Ma rri ewuhrẹ egagọ mai ghaghae gaga re keme u re fiobọhọ kẹ emọ mai you Ọghẹnẹ je wo usu okpekpe kugbei onọ u re ru ai jọ yoyou, dhesẹ ororokẹ jẹ riẹ ru evaọ kabọ kabọ uzuazọ. Ma yere okọto na kẹ emamọ oziẹ nana.”

Armin Pikl, ọriẹ-izi nọ o dikihẹ kẹ Falcone, ọ ta nọ: “Oziẹ nana u dhesẹ nọ ikokohọ Isẹri Jihova yọ ikokohọ egagọ, o tẹ jẹ kẹ esẹgbini udu nọ a rẹ rọ rehọ eware nọ a jọ egagọ rai rọwo wuhrẹ emọ rai. Emọ Isẹri Jihova nọ e gbẹ rrọ isukulu a ti wo erere no oziẹ nana ze keme u ti fiobọhọ kẹ ae sae siọ isukulu ba kpohọ emamọ ikokohọ nana. Me rẹro nọ ekọto efa nọ e rrọ erẹwho efa a ti roro kpahe oziẹ nana nọ a te wo oghẹrẹ ẹdhọ otiọna.”