SELTERS, Germany—Evaọ edẹ 21 Azeza, 2013 osu ẹwho na avọ ahwo egọmeti efa a jọ oria nọ a re se Lautertal-Reichenbach rovie utho ekareghẹhọ nọ a ru kẹ Max Liebster, Osẹri Jihova jọ nọ ọ jọ uwou-odi etoke nọ o vrẹ ikpe isoi evaọ otọ esuo Hitler. Ahwo ẹwho na efa a jọ etẹe, te aye-uku Max Liebster nọ a re se Simone nọ ọ rrọ Osẹri Jihova re.

Mr. Liebster yọ ohwo Ju nọ ọ jẹ rria obọ Germany evaọ etoke esuo Hitler, evaọ 1939 a te mu ei, kẹsena a te fi ei họ iwou-odi isoi sa-sa, eyehọ Sachsenhausen, Neuengamme, Auschwitz, Buna, gbe Buchenwald. Imaree soso evaọ uviuwou riẹ a whu evaọ uwou-odi. Ọsẹ riẹ ọ rrọ usu na, yọ okenọ ọsẹ riẹ o whu, ọye ọvo ọ wọ ori na kpohọ oria nọ a rẹ jọ mahe ahwo nọ i whu evaọ uwou-odi ọ Sachsenhausen.

Okenọ Mr. Liebster ọ jọ uwou-odi, Isẹri Jihova nọ a gbẹ jọ uwou-odi na a te mu Ebaibol họ ewuhrẹ kugbei. Kẹsena evaọ 1945 nọ o no uwou-odi ze no ọ tẹ họ-ame. A kere fihọ utho nọ a ma kẹe na nọ ẹrọwọ Mr. Liebster “oye o kẹ riẹ ẹgba thihakọ.” O whu evaọ 2008 nọ ọ jọ ikpe 93.

A kere fihọ obe nọ a ro zizie ahwo kpohọ ekareghẹhọ Mr. Liebster na nọ “u mu rie ẹro nọ izi Ọghẹnẹ i re ru ahwo dhesẹ emamọ uruemu.” Ọtota Isẹri Jihova evaọ Germany nọ a re se Wolfram Slupina ọ ta nọ: “Eva e were omai inọ a kareghẹhọ omọvo jọ evaọ usu ibe eg’Ọghẹnẹ mai nọ e gbaudu se ẹmo-ofio makọ evaọ oke ukpokpoma. Utho nana nọ a ro vi na u gine dhesẹ vevẹ nọ Ebaibol na o wo ẹgba nọ o rẹ rọ wha udhedhẹ gbe okugbe ze, yọ onana Isẹri Jihova a be daoma ru lele.”

Inọmba nọ Whọ rẹ Sai Se:

Akpọ-soso: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110