Ikpe udhone nọ i kpemu, a wọ Minos Kokkinakis nọ a mu kpohọ ukoliko Greece jọ nọ a re se Amorgós nọ ọ rrọ Aegean Sea, yọ ẹgbukpe gbe amara ọ jọ uwou-odi evaọ etẹe. Ababọ ẹdhọ nọ a gu tao, okọto Greece jọ u brukpe Brọda Kokkinakis inọ ọ raha uzi okpokpọ jọ nọ o ta nọ a rẹ ta usi uwoma ha. Brọda Kokkinakis họ Osẹri Jihova ọsosuọ evaọ usu Isẹri Jihova nọ i bu te idu ikpegbizii gbe udhuhrẹ gbe ihrẹ (19,147) nọ a mu, no ukpe 1938 rite 1992 inọ a raha uzi nana nọ osu Greece nọ a re se Ioannis Metaxas o fihọ. Evaọ etoke ikpe yena, Isẹri Jihova buobu nọ e rrọ ahwo Greece a ruabọhọ usi uwoma ota na ghelọ ukpe igbabọ gbe uwou-odi nọ a mu rai fihọ unuẹse buobu.

Nọ Brọda Kokkinakis ọ jọ oware wọhọ ikpe 30, o te mu ẹdhọ họ egu evaọ okọto kpahe ufuoma nọ ọ rẹ rọ ta usi uwoma kẹ amọfa kpahe oware nọ ọ rọwo, yọ ẹdhọ na o siotọ te ikpe 50. A mu rie vrẹ asia udhosa, yọ ọ rria uwou-odi gbe ikoliko nọ a re mu ahwo fihọ vrẹ ikpe ezeza. A rẹ ruẹ unu gbiku oja nọ Brọda Kokkinakis gbe Isẹri Jihova efa a re he evaọ etoke yena. Nọ Brọda Kokkinakis o te ikpe 77 no, a tẹ wariẹ mu ei jẹ rehọ iẹe kpohọ okọto. Ọ tẹ vuẹ okọto na inọ a mu ei ekueku gheghe, rekọ okọto na u brukpei ghele. Ọ tẹ kpare ẹdhọ na kpohọ ekọto ikpehru efa rekọ ọ rease he. Ukuhọ riẹ ọ tẹ kpare ẹdhọ na kpohọ Okọto nọ O Mai Kpehru evaọ Greece, ghele na a brukpei ghele. Uwhremu na, Brọda Kokkinakis o te tu ẹdhọ na kpohọ okọto nọ o mai kpehru evaọ Europe nọ a re se European Court of Human Rights (ECHR). Ọ vuẹ okọto na inọ orẹwho Greece o be whaha iẹe uvẹ nọ ọ rẹ rọ gọ Ọghẹnẹ. Evaọ 1993 nọ Brọda Minos Kokkinakis o te ikpe 84 no, European Court of Human Rights na u te bru kẹe; yọ onana o jọ orọ ọsosuọ nọ okọto ECHR na u ro brukpe orẹwho soso fiki ufuoma egagọ. a Ukpe 2018 o gba ikpe 25 nọ a ro bruoziẹ yena nọ o wuzou gaga na. Elọya jọ nọ ọ rrọ prọfẹsọ ọ ta nọ “ẹsibuobu nọ iguẹdhọ gbe elọya a tẹ gwọlọ fodẹ oziẹobro jọ nọ o wuzou gaga nọ European Court of Human Rights u bru kpahe ufuoma egagọ no,” ẹdhọ Kokkinakis na a rẹ fodẹ.

Oziẹ nọ a bru kẹ Brọda Kokkinakis na o wuzou gaga keme ọye iguẹdhọ buobu a bi rri ro guẹdhọ ahwo buobu nọ egọmeti sa-sa a bi kienyẹ fiki egagọ, wọhọ epanọ egọmeti Russia ọ be whaha inievo mai uvẹ nọ a rẹ rọ gọ Ọghẹnẹ na.

Brọda Kokkinakis o kru ẹrọwọ riẹ, yọ ọ gbẹ jẹ ta usi uwoma na ghelọ ukpokpoma nọ u te rie; oriruo riẹ o be tuduhọ inievo mai awọ, enọ e be rẹriẹ ovao dhe ọwọsuọ fiki usi uwoma ota na. Fikinọ Brọda Kokkinakis o kru ẹrọwọ riẹ, okọto u bruoziẹ kẹe uwhremu na, yọ onana u bi fiobọhọ kẹ inievo mai nẹnẹ.—Ahwo Rom 1:8.