Evaọ ẹdẹ avọ 2 rite ẹdẹ avọ 3 amara Azeza, 2023, okposo ọgaga nọ ọ rrọ u ru nọ ame o ro ku eria jọ evaọ Haiti. A niyẹrẹ nọ ame o ku iwou ahwo buobu, yọ onana u kpomahọ iviuwou nọ i bu te enwenọ idu udhuvẹ (40,000), nọ e rrọ eria sa-sa evaọ orẹwho na. Ahwo nọ a kwa no iwou rai a bu vi idu ikpegbesa gbe egba isoi (13,500). Yọ ahwo nọ a bu te udhuvẹ-gbikpe a whu.

• Oniọvo mai ọvuọvo o whu hu

• Oniọvo-ọmọzae gbe oniọvo-ọmọtẹ jọ ọvo a nwoma

• Iwhowho-uvie udhosa a kwa no iwou rai

• Uwou ọvo ọ raha muotọ

• Iwou esa e raha gaga

• Iwou ikpegbizii e raha omojọ

• Ọgwa Uvie mai hayo Ọgwa Okokohọ mai ọvuọvo ọ raha ha

• Esẹro okogho gbe ekpako ukoko a be rọ Ẹme Ọghẹnẹ tuduhọ inievo nọ eware rai e raha awọ je bi fiobọhọ kẹ ae wo eware nọ a gwọlọ

• Ikoko nọ e rrọ ubrotọ na a bi kuomagbe evaọ iruo ogbodhẹ nọ a bi ro fiobọhọ kẹ inievo na

Ma riẹ nọ Jihova ọ te kẹ inievo mai nọ ame o ku eware rai evaọ Haiti na “ẹgba” nọ a sai ro thihakọ.—Olezi 29:11.