ANE 2, 2019
KAZAKHSTAN
Isẹri Jihova nọ E Rrọ Kazakhstan A Zizie Ahwo re A Ziọ Ugheriwo Evaọ Egwa Uvie Rai
No Asoi 11 rite Akpegbọvo 10, 2018, Isẹri Jihova nọ e rrọ Kazakhstan a zizie ahwo nọ a rrọ okegbe rai ziọ ugheriwo evaọ Egwa Uvie nọ e rrọ ikpewho ihrẹ sa-sa. Onana u rovie uvẹ fihọ nọ ahwo egọmeti, eniyẹrẹ, profẹsọ sa-sa, gbe amọfa a rọ riẹ kpahe Isẹri Jihova ziezi. Ahwo nọ a kpohọ ugheriwo na a bu vi odu ọvo gbe egba isoi (1,500).
Ewho nọ a jọ ziọ ugheriwo na: (1) Öskemen, (2) Qaraghandy, (3) Qostanay, (4) Semey, (5) Shymkent, (6) Taldyqorghan, gbe (7) Taraz.
Ikpewho nana a jọ zizie ahwo kpohọ Egwa Uvie na: Öskemen, Qaraghandy, Qostanay, Semey, Shymkent, Taldyqorghan, gbe Taraz. Ahwo nọ a nya na a ruẹ iwoho gbe ebe sa-sa nọ e ta kpahe iruẹru Isẹri Jihova evaọ Kazakhstan no anwọ ukpe 1892 ze. I te je dhesẹ iruẹru Isẹri Jihova evaọ oke mai na, wọhọ Ebaibol Efafa Akpọ Ọkpokpọ ọrọ Ikereakere Efuafo Na nọ a siobọno evaọ ẹvẹrẹ Kazakh evaọ ukpe 2014.
Brọda Bekzat Smagulov, nọ o re ru iruo evaọ Ẹko-Iruo Izi gbe Ẹko-Iruo Evuẹ evaọ uwou ogha Kazakhstan ọ ta kpahe ewoma nọ o no onana ze inọ: “Eva e were ahwo nọ a ziọ ugheriwo na gaga fiki eware nọ a ruẹ, yọ u fiobọhọ kẹ ae riẹ oghẹrẹ ahwo nọ ma ginẹ rrọ. Ahwo jọ nọ a ziọ ugheriwo na họ, ahwo nọ a re ru iruo evaọ Department of Religious Affairs, eniyẹrẹ nọ i re ru iruo evaọ eria awhusi Kazakhstan-Öskemen, jegbe enọ i re ru iruo kugbe ebe-usi nọ a re se Rudnyi Altai gbe ebe-usi Semei Vesti.”
Evaọ Ọgwa Uvie nọ ọ rrọ Taldyqorghan, okpẹwho esuo ubrotọ Almaty, ohwo nọ o wuzou Regional Department of Religious Affairs gbe imava efa nọ i bi ru iruo evaọ oria yena a nyaze re. Omọfa jọ nọ ọ nyaze họ okere obe-usi nọ a re se Zhetysu Dialog, yọ uwhremu na o kere kpahe ahwo jọ nọ a kiẹ riwi evaọ oria ugheriwo na.
Ofariẹ, Ebaibol Efafa Akpọ Ọkpokpọ nọ inievo mai a ghale kẹ ahwo evaọ ẹvẹrẹ Kazakh gbe Russian i bu vi egba isoi gbe udhosa (560), yọ evẹrẹ ivẹ nana ahwo a rẹ mae ta evaọ Kazakhstan. Eva e were omai gaga fiki emamọ iyẹrẹ nọ i no ọruẹrẹfihotọ nana ze, keme o wha orro se Jihova je ru nọ ahwo nọ a rrọ okegbe na a rọ ruẹ “iruo iwoma” mai.—Matiu 5:16.
Evaọ ẹwho Qaraghandy, Sista Saniya Akhmetzhanova ọ be rọ ẹvẹrẹ obọ rọ t’ẹme ta kẹ ọzae-avọ-aye jọ nọ i diezọ kpahe epanọ ma be rọ daoma wuhrẹ ahwo nọ a diezọ Ebaibol na.
Emaha ivẹ jọ nọ e ziọ ugheriwo evaọ ẹwho Qaraghandy nọ i bi rri ividio Thọ Emọ Ra evaọ ẹvẹrẹ Russian.
Brother Lev Gladyshev explains the history of Jehovah’s Witnesses in Kazakhstan to officials who visited the open house in Qaraghandy, including the secretary of the local parliament, Kudaibergen Beksultanov; the chief specialist of the DBrọda Lev Gladyshev nọ ọ be ta kẹ ahwo egọmeti nọ e ziọ ugheriwo na evaọ Qaraghandy kpahe ikuigbe Isẹri Jihova evaọ Kazakhstan. Ahwo jọ evaọ usu rai họ, Kudaibergen Beksultanov nọ ọ rrọ okere-obe egọmeti okpẹwho na; Nikolay Sarsenbayev nọ ọ rrọ ohwo nọ o wuzou Department of Analysis of the Religious Situation; gbe Nurlan Bikenov nọ o wuzou Department of Religious Affairs evaọ ubrotọ Qaraghandy.
Sista Aisha Yakovleva nọ o bi dhesẹ eware nọ e rrọ JW Library® kẹ ọzae-avọ-aye jọ nọ e ziọ ugheriwo evaọ ẹwho Taldyqorghan.
Brọda Aleksey Alyoshin nọ o bi dhesẹ ebe gbe eria sa-sa nọ odẹ Ọghẹnẹ o jọ romavia no kẹ ahwo nọ e ziọ ugheriwo evaọ ẹwho Taraz.
Evaọ ẹwho Öskemen, Brọda Sergey Petkevich ọ be rehọ Uwou-Eroro anwae jọ evaọ ẹvẹrẹ Russian ta kpahe ikuigbe Isẹri Jihova evaọ Kazakhstan. Ohwo jọ nọ ọ ziọ ugheriwo na họ Sergey Lebedev nọ o wuzou Edinstvo public association.
Brọda Georgiy Pismenoy (obọze) nọ ọ be ta ẹme kugbe ahwo nọ a ziọ ugheriwo evaọ ẹwho Qostanay. Ahwo nọ a ziọ ugheriwo na a rri ividio nọ a jọ dhesẹ inievo jọ nọ okọto o ta nọ a reabe evaọ ukpe 1982, fikinọ a bi printi jẹ ghale ebe mai nọ a fi awhaha họ evaọ oke yena. Brọda Pismenoy yọ omọvo jọ evaọ usu inievo-emezae esa nọ a fihọ ega uye evaọ ikpe ivẹ gbe ubro. Brọda Pismenoy o gbiku epanọ o jọ kẹ ahwo nọ a ziọ ugheriwo na.
Evaọ ẹwho Shymkent, a kporo ile ro dede ahwo nọ a ziọ ugheriwo na rehọ. A kporo ole Kazakh jọ nọ a re se dombra (eye a bi kporo evaọ obọze gbe ẹkpẹlobọ na).
Inievo nọ e fialoma via ru iruo evaọ Ọgwa Uvie nọ ọ rrọ ẹwho Qaraghandy.
