Evaọ ubrobọ emuhọ Asa 2023, ahwo nọ a bu vi idu udhegbọvo (21,000) a kpohọ oria jọ nọ a re jo dhesẹ ebe nọ a re se Latvian Book Fair evaọ okpẹwho Riga. Ọnana họ orọ avọ isiahrẹ nọ inievo mai a be rọ wha ebe mai kpohọ oria nana, gbe orọ ọsosuọ anwẹnọ okpẹyao COVID-19 na o ro du lahwe na. Eva e were e rai gaga nọ a sai ro dhesẹ Ebaibol Efafa Akpọ Ọkpokpọ ọrọ Ikereakere Efuafo Na evaọ ẹvẹrẹ Latvia kẹ ahwo, onọ a siobọno evaọ 2020.

Inievo mai a daoma dhesẹ odẹ Ọghẹnẹ, Jihova kẹ ahwo ziezi evaọ Ebaibol na. Akpọ o je gbe ahwo nọ a nyaze oria na unu gaga nọ a vuẹ ae nọ odẹ Jihova ọ rrọ Ebaibol ọsosuọ nọ a fa fihọ ẹvẹrẹ Latvia evaọ 1689. Akpọ o tube gbe ai unu viere nọ a vuẹ ae nọ eria nọ a zihe odẹ Ọghẹnẹ fihọ evaọ Ebaibol Efafa Akpọ Ọkpokpọ na i bu vi idu ihrẹ (7,000).

U wo eware efa jọ nọ e were ahwo jọ gaga evaọ Ebaibol Efafa Akpọ Ọkpokpọ na. Ọzae jọ nọ o bi ru iruo evaọ oria nọ a rẹ jọ printi ebe, ọ ta kpahe epanọ eware nọ a ro ru Ebaibol na i woma te. Ọ ta nọ a ru Ebaibol na re ọ tọ ziezi o tẹ make rọnọ a bi sei kẹdẹ kẹdẹ.

Omọfa jọ nọ a kẹ Ebaibol na ọ ta nọ eme nọ ahwo a be ta kẹdẹ kẹdẹ a ro kere Ebaibol Efafa Akpọ Ọkpokpọ na, yọ ohwo ọ sai sei lọlọhọ. Ọ ta nọ u wo oke jọ nọ ọ jẹ gwọlọ se Ebaibol na rekọ ọ sai sei te oria ovo ho, keme o je wo otoriẹ oware nọ o bi se he. Rekọ enẹna, ọye avọ ọmọtẹ riẹ a te daoma se Ebaibol Efafa Akpọ Ọkpokpọ na kugbe. Evaọ edẹ esa nọ a jọ etẹe na, a kẹ ahwo Ebaibol Efafa Akpọ Ọkpokpọ Latvian nọ i bu vi udhozeza-gbikpe (130).

Eva e were inievo mai nọ i kpohọ oria nana gaga keme a fiobọhọ kẹ ahwo riẹ kpahe Ebaibol na gbe ọnọ o wo rie. Oniọvo-ọmọtẹ jọ nọ eva e were gaga ọ ta nọ: “Evaọ emedẹ jọ ọvo, me fiobọhọ kẹ ahwo buobu riẹ kpahe odẹ Jihova. Me ri ru oware utiona ẹdẹvo ho!”

Ma be ta ẹme na, iwhowho-uvie nọ e rrọ orẹwho Latvia a bu vi idu ivẹ gbe ẹgba ọvo (2,100). Eva e were omai nọ Ebaibol nọ a fa fihọ ẹvẹrẹ nọ ahwo a be ta kẹdẹ kẹdẹ o bi fiobọhọ kẹ inievo mai gbe amọfa kpobi nọ a gwọlọ wuhrẹ Ẹme Ọghẹnẹ, yọ a bi si kẹle Jihova.​—Jemis 1:17.