Evaọ ẹdẹ avọ 9 ọrọ Azeza, 2023, a siobọno Ebaibol Efafa Akpọ Ọkpokpọ ọrọ Ikereakere Griki Ileleikristi Na evaọ ẹvẹrẹ Nahuatl (Central) gbe Tarascan. A siobọno Ebaibol ivẹ nana evaọ ẹdẹ ọsosuọ Okokohọ Ologbo Isẹri Jihova nọ uzoẹme riẹ o ta nọ, “Wo Odiri”! A ru okokohọ na evaọ ẹvẹrẹ Nahuatl (Central) gbe Tarascan. Ma te ta kpahe emeware jọ evaọ Ebaibol ivẹ nana nọ a siobọno na.

Brọda Sean Scribner, nọ ọ rrọ Ogbẹgwae Uwou Ogha Central America họ ọnọ o siobọno Ikereakere Griki Ileleikristi na nọ a fa fihọ ẹvẹrẹ Nahuatl (Central) na, yọ ahwo nọ a jọ okokohọ na a bu te odu ọvo, egba ene gbe udhosa gbe ikpegbene (1,474). A ru okokohọ Nahuatl (Central) na evaọ ubrotọ Puebla, evaọ Mexico. Ahwo nọ a bu te oware wọhọ idu egba isoi (500,000) ae a be ta ẹvẹrẹ Nahuatl (Central) evaọ Mexico, yọ ahwo nana buobu a be rria ofẹ obọze ovatha-ọre gbe ibrotọ nọ e rrọ udevie Mexico.

Ahwo nọ a fa Ebaibol Ikereakere Griki Ileleikristi na a romatotọ salọ eme elọlọhọ nọ a re wo otoriẹ rai ziezi nọ ahwo Nahuatl (Central) a be hae ta kẹdẹ kẹdẹ. Ofariẹ, Ebaibol Efafa Akpọ Ọkpokpọ ọrọ Ikereakere Griki Ileleikristi Na nọ a fa fihọ ẹvẹrẹ Nahuatl (Central) na, o wo eme-obotọ nọ a jọ ru igogo eme buobu nọ a rẹ ta oghẹrẹsa vẹ. Rekọ oware nọ o mai woma kpahe efafa nana họ, whọ rẹ ruẹ odẹ Ọghẹnẹ, Jihova evaọ eria sa-sa nọ ọ jọ romavia evaọ Ikereakere na.

Brọda Curtis Mills, nọ ọ rrọ Ogbẹgwae Uwou Ogha Central America họ ọnọ o siobọno Ikereakere Griki Ileleikristi na nọ a fa fihọ ẹvẹrẹ Tarascan na, yọ ahwo nọ a jọ okokohọ na a bu te egba ezeza, gbe udhosa gbe ivẹ (662). A ru okokohọ na evaọ ubrotọ Michoacan, evaọ Mexico. Ahwo nọ a be ta ẹvẹrẹ Tarascan evaọ Mexico a bu vi oware wọhọ idu udhoree gbe ikpegbisoi (175,000), yọ ahwo nọ a be ta ẹvẹrẹ nana evaọ United States a bu te oware wọhọ idu udhosa (60,000).

Dede nọ whọ rẹ ruẹ Ebaibol Ikereakere Griki Ileleikristi na sa-sa nọ a fa fihọ ẹvẹrẹ Tarascan no, whọ rẹ ruẹ nọ eme nọ a rọ fae e rrọ gaga yọ ahwo a gbẹ be ta ẹme ere he. Ofariẹ, a jarai fa eware jọ gba ha wọhọ epanọ u fo nọ e rẹ jọ. Wọhọ oriruo, enẹ a fa obe Jọn 10:30 evaọ efafa Ebaibol nana jọ: “Mẹ avọ Ọghẹnẹ Ọsẹ na ọvo na.” Rekọ enẹ a fa riẹ evaọ Ebaibol Efafa Akpọ Ọkpokpọ ọrọ Ikereakere Griki Ileleikristi Na evaọ ẹvẹrẹ Tarascan: “Mẹ avọ Ọsẹ na ma rrọ okugbe ọvo.” Onana u dhesẹ nọ Jihova avọ Jesu a wo iroro ọvo yọ a re ru eware kugbe, rekọ a rrọ ẹrẹrẹe he.

Ma bi rẹro nọ Ebaibol ivẹ nana i ti fiobọhọ kẹ ahwo buobu wuhrẹ kpahe Jihova jẹ gọe.—Aizaya 2:3.