Evaọ Aria 15 gbe 16, 2020, a siobọno Ebaibol Efafa Akpọ Ọkpokpọ ọrọ Ikereakere Griki Ileleikristi Na, onọ a re rovie evaọ ifonu gbe ekọmputa, evaọ ẹvẹrẹ Changana gbe Macua rọkẹ iwhowho-uvie nọ e rrọ Mozambique. Iwhowho-uvie nọ e rẹ ta ẹvẹrẹ Changana a bu vi idu eree (8,000), yọ enọ e rẹ ta ẹvẹrẹ Macua a bu vi odu ọvo gbe egba ihrẹ (1,700).

Brọda David Amorim, nọ ọ rrọ Ogbẹgwae Uwou Ogha Mozambique họ ọnọ o siobọno Ebaibol ivẹ nana. A rekọdo eme ovuẹ nọ a kẹ ro siobọno Ebaibol na nọ inievo na a gaviezọ kẹ na kpahotọ no vẹre. U te no ere no, a kẹ inievo na uvẹ re a jọ etẹlẹvisiọno gbe iredio steshọno nọ i bu vi ọgba whowho ovuẹ na.

A rẹ mae ta ẹvẹrẹ Changana evaọ ibrotọ ivẹ nọ e rrọ ofẹ obọze ovatha-ọre Mozambique, yọ enwene ahwo nọ a bu te ima ọvo gbe idu egba izii (1,900,000) a rẹ ta ẹvẹrẹ na. Ẹvẹrẹ Changana na avọ ẹvẹrẹ Tsonga nọ ahwo orẹwho South Africa nọ o kẹle rai a rẹ ta i tho oma gaga.

Ẹkwotọ ahwo Macua o rrọ ibrotọ nọ e rrọ ofẹ ẹkpẹlobọ ovatha-ọre Mozambique. Enwene ahwo nọ a bu te ima isoi gbe idu egba eree (5,800,000) a rẹ ta ẹvẹrẹ Macua, yọ ẹvẹrẹ nana emotọ Mozambique a rẹ mae ta.

Evaọ ikpe buobu, o jọ bẹbẹ gaga kẹ iwhowho-uvie nọ e rẹ ta evẹrẹ nana re a dẹ Ebaibol. Ebaibol e jọ ghaghae, yọ evaọ ẹsejọ, ahwo nọ a rẹ zẹ Ebaibol na a jẹ rọwo zẹ kẹ Isẹri Jihova ha. Oniọvo jọ nọ ọ rrọ ọfefafa ọ ta kpahe epanọ eware e jọ, inọ: “Mẹ ruẹ ikoko nọ i wo Ebaibol ọvuọvo no, yọ obọ Ọgwa Uvie a jẹ hai fi ei họ re ahwo nọ a te kẹ ovuẹ gbe amọfa nọ a kẹ ẹme evaọ ewuhrẹ a sae ruẹ e riẹ ro ru ẹme rai.”

Inievo-emezae gbe erọ emetẹ mai a ghọghọ gaga nọ Ebaibol Ikereakere Griki Ileleikristi Na u te ai obọ evaọ ẹvẹrẹ Changana gbe Macua, yọ ma ghọghọ kẹ ae gaga re. Ma riẹ nọ Ebaibol nana i ti fiobọhọ kẹ ahwo buobu “wo eriariẹ egbagba uzẹme na.”—1 Timoti 2:3, 4.