ỌVO 29, 2019
PERU
A Ru Okokohọ Ubrotọ Obọdẹ Urere ọrọ 2018 Evaọ Peru
Evaọ Akpegbọvo 23 rite 25, 2018, a ru okokohọ ubrotọ obọdẹ urere ọrọ ukpe na evaọ Peru, yọ ahwo nọ a bu te idu esa gbe egba ene (3,400) a no erẹwho izii ze kpohọ okokohọ na nọ uzoẹme riẹ o ta nọ: “Wo Udu”! A ru okokohọ na evaọ Monumental Stadium nọ ọ rrọ Lima, okpẹwho esuo Peru. Ahwo nọ a jọ okokohọ na kpobi, te enọ e rọ itanẹte thuru kugbe okokohọ na no eria efa ze a bu te idu udhosa gbe ezeza, egba ivẹ gbe udhuvẹ gbe ikpegbene (66,254); yọ ahwo egba ihrẹ gbe ikpegbizii a họ-ame (719). A ru okokohọ na evaọ ẹvẹrẹ Oyibo, Ẹvẹrẹ Obọ rọ t’Ẹme Peru, Quechua Ayacucho, gbe Spanish evaọ oke ovona.
Ọmaha jọ nọ o kpohọ okokohọ na nọ o bi yere inievo na evaọ ẹdẹ urere okokohọ na.
Oware jọ nọ a ru evaọ etoke okokohọ na họ, inievo nọ i no erẹwho efa ze avọ inievo nọ e rrọ Peru a kpohọ usi uwoma ota kugbe. Inievo nọ i no erẹwho efa ze na a te je wo uvẹ nọ a rọ re emu Peru, riẹ kpahe uruemu ẹwho na, je kpohọ ugheriwo evaọ uwou ogha Peru.
Oniọvo nọ a re se Ezequiel Porras nọ ọ rrọ uwou ogha na ọ ta nọ: “Okokohọ ubrotọ obọdẹ nana o fiobọhọ kẹ omai gaga evaọ Peru. Orọnikọ inievo na ọvo okokohọ na o duobọte he, rekọ o jọ isẹri-ise kẹ ahwo ẹwho na re. Ma yere Jihova rọkẹ uvẹ ulogbo nana nọ o wha orro se odẹ riẹ na.”—1 Pita 2:12.
A ru eria ame-ọhọ sa-sa fihọ Monumental Stadium nọ a jọ ru okokohọ na, yọ ahwo egba ene gbe udhone gbe esa (483) a họ-ame. Ahwo nọ a họ-ame evaọ eria efa nọ i thuru kugbe okokohọ na a bu te egba ivẹ gbe ọgba gbe ezeza (236).
Oniọvo nọ o no orẹwho ofa ze avọ oniọvo nọ ọ rrọ Peru nọ a rrọ usi uwoma ota.
Brọda Samuel Herd nọ ọ rrọ Omọvo Utu Ẹruorote Na o ru ẹme urere okokohọ na.
Inievo nọ e rrọ Peru nọ a be hẹrẹ evaọ Jorge Chávez International Airport nọ ọ rrọ Lima re a dede inievo nọ i bi no erẹwho efa ze rehọ.
Inievo nọ i kpohọ ugheriwo evaọ uwou ogha na a te oria nọ a jọ dhesẹ oghẹrẹ nọ Ọghẹnẹ ọ rọ sẹro odẹ riẹ evaọ Ebaibol na.
Inievo nọ e rrọ Peru a dhesẹ epanọ a re ro there emu Peru sa-sa evaọ arozaha nọ a jọ Ọgwa Okokohọ jọ ru. A jọ etenẹ there emu Peru jọ nọ a re se ceviche kẹ inievo nọ i no erẹwho efa ze.
Inievo na a dhesẹ oghẹrẹ nọ a rẹ rọ rehọ olulu zuo eware sa-sa. Kẹsena a tẹ rọ ọda nọ a ru no ekakọ ze ro ru ekọlọ sa-sa fihọ eware nọ a zuo na.
A ru ẹkeriotọ omawere nọ a jọ kporo ole “Fiobọhọ Evaọ Oria nọ Ẹgwọlọ Ọ Mae Rrọ” rọkẹ inievo nọ i no erẹwho efa ze na. Eware nọ a re ro kporo ile evaọ ibrotọ esa Peru nọ a re se coastal desert, Andes Mountains, gbe Peruvian rain forest a ro kporo ole na; yọ a gbile fihọ iẹe.
A gbe oghẹrẹ ile jọ nọ a re gbe evaọ ẹwho Trujillo evaọ ẹkeriotọ omawere na.
A ru idhesẹvia usi uwoma ota sa-sa evaọ ẹkeriotọ omawere na. A dhesẹ oghẹrẹ uwou ẹkpẹ gbe osẹ ahwo Quechua nọ a be rria ofẹ igbehru ọrọ iwhre Cuzco.
Ahwo nọ a gbile gbe enọ i ru idhesẹvia na kpobi nọ a bi veghe obọ kẹ inievo na evaọ ekuhọ ẹkeriotọ na.