Evaọ ikokohọ obọdẹ jọ nọ a ru evaọ amara Ọvo 2019, Brọda Mark Sanderson, nọ ọ rrọ omọvo Utu Ẹruorote na, o siobọno Ebaibol na evaọ evẹrẹ Cebuano, Tagalog, gbe Waray-Waray. A siobọno orọ ẹvẹrẹ Cebuano na evaọ Hoops Dome evaọ Lapu-Lapu City evaọ Ọvo 12. Okioke riẹ, a te siobọno orọ ẹvẹrẹ Waray-Waray evaọ Leyte Academic Center evaọ Palo, Leyte. Evaọ Ọvo 20, a te siobọno orọ ẹvẹrẹ Tagalog evaọ Ọgwa Okokohọ Metro Manila evaọ Quezon City.

Ahwo a jọ Egwa Uvie buobu thuru kugbe ọruẹrẹfihotọ nana, yọ a ghale Ebaibol Efafa Akpọ Ọkpokpọ na nọ i bu te idu udhoree-gbesa (163,000) kẹ ahwo.

Brọda Dean Jacek, nọ ọ rrọ uwou ogha Philippines, ọ ta nọ: “Ebaibol Efafa Akpọ Ọkpokpọ evaọ ẹvẹrẹ Cebuano gbe orọ Tagalog na yọ onọ a wariẹ fa nọ a ru eme riẹ lọhọ na. O rehọ inievo na vrẹ ikpe esa re a tẹ fa Ebaibol na ọvuọvo re. Ikereakere Griki Ileleikristi na ọvo ẹvẹrẹ Waray-Waray a wo vẹre, fikiere onana họ orọ ọsosuọ nọ a ti ro wo oma Ebaibol Efafa Akpọ Ọkpokpọ na soso. O rehọ vrẹ ikpe isoi re a tẹ fa Ebaibol na re.”

Evaọ obọ Philippines, ahwo nọ a rẹ jẹ ẹvẹrẹ Cebuano, Tagalog, hayo Waray-Waray a bu vi abọvo ahwo nọ a rrọ orẹwho na soso. Yọ inievo-emezae gbe erọ emetẹ mai nọ e rẹ jẹ evẹrẹ nana a bu te oware wọhọ idu udhoree (160,000), yọ ahwo nọ a bi wuhrẹ Ebaibol kugbe nọ e rẹ jẹ evẹrẹ nana re a bu vi idu udhuzii gbe ikpegbihrẹ (197,000). U te no ere no, ahwo Philippines buobu nọ e be rria erẹwho efa, a te sai se Ebaibol Efafa Akpọ Ọkpokpọ na evaọ evẹrẹ nana je wo erere no eware sa-sa nọ a ru fihọ iẹe na ze re.

Nọ Sista Donica Jansuy, nọ ọ rrọ ukoko ẹvẹrẹ Tagalog evaọ obọ United States ọ danlodu Ebaibol ọkpokpọ na no evaọ itanẹte, ọ ta nọ: “Eme Ebaibol ẹvẹrẹ Tagalog nọ a wariẹ fa na e rrọ vevẹ nọ ohwo ọ rẹ sai wo otoriẹ rai lọlọhọ. Fiki eme elọlọhọ nọ a rọ fa Ebaibol na o tẹ wọhọ ẹsenọ Jihova ọ be ta ẹme kẹ omai ovao dhe ovao, onọ u bi ru nọ eme na i bi ro duobọte omai udu vi epaọ ọsosuọ.”

Rite enẹna, Isẹri Jihova a fa oma Ebaibol Efafa Akpọ Ọkpokpọ na soso hayo abọ riẹ jọ fihọ evẹrẹ udhoree gbe ikpegbizii (179) no. Ma yere Jihova gaga nọ o bi ro fiobọhọ kẹ idibo riẹ ru Ẹme riẹ vẹ kẹ inievo-emezae gbe erọ emetẹ mai gbe ahwo nọ a bi wuhrẹ Ebaibol na kugbe.​—Iruẹru Ikọ 13:48.