Evaọ Akpegbivẹ 2, 2019, ofou-owhre nọ a se Kammuri, o fou raha eware evaọ ubrotọ Bicol, evaọ ofẹ obọze ovatha-ọre Luzon. Yọ a re je se ofou-owhre nana Tisoy evaọ obọ Philippines. Dede nọ Osẹri Jihova ọvuọvo o whu hayo nwoma ha, iwou 108 erọ Isẹri Jihova e raha gaga, yọ iwou 478 e dina raha. U te no ere no, Egwa Uvie 15 e tẹ jẹ raha re.

Fiki oghẹrẹ nọ ofou na ọ raha eware te, Uwou Ogha Philippines o rehọ Egbẹgwae Obufihọ kẹ Ahwo nọ Eware Okpẹtu E Via Kẹ eree mu re a fiobọhọ kẹ inievo na wo eware nọ a gwọlọ jẹ tuduhọ ai awọ.

Ma be lẹ roro inievo mai nọ e rrọ obọ Philippines na, yọ wọhọ ọso-ilezi na ma be lẹ nọ: “Jọ Jihova o yo olẹ ra evaọ ẹdẹ uye. . . . Jọ o fiobọhọ kẹ owhẹ no oria ọrẹri riẹ ze.”—Olezi 20:1, 2.