Ofẹ obọze ovatha-ọre Luzon gbe ikoliko nọ e kẹle riẹ

• Evaọ Akpe 25, 2020, ofou-owhre nọ a se Molave, nọ ahwo Philippines a re je se Quinta, ọ raha eware gaga evaọ ubrotọ Albay nọ ọ rrọ Bicol evaọ Luzon, Philippines. Kẹsena okpofou ọgaga na o te fou ruọ abọdekọ ukoliko Luzon na

• Evaọ Akpegbọvo 1, 2020, ofou-owhre ọgaga nọ a se Goni, onọ a re je se Rolly evaọ Philippines u fou ruọ Catanduanes, ukoliko ọfa jọ evaọ ubrotọ Bicol nọ ọ rrọ Luzon. Okpofou avọ ame na ọ tẹ jẹ raha eware evaọ ibrotọ efa nọ ofou-owhre nọ a se Molave na ọ kake jọ raha eware no vẹre

• Ofou-owhre ọgaga nana nọ o fou isiava na u ru nọ okposo ọ rọ rrọ avọ ifou egaga, o tẹ lẹliẹ owhe ku eria na. Fikiere ikpẹ e gbẹ jariẹ hẹ, yọ ahwo buobu a wo ame nọ a rẹ da ha. Yọ o gbẹ rrọ bẹbẹ gaga re a rọ Itanẹte hayo ifonu ta ẹme kugbe ahwo nọ a rrọ eria nọ okpẹtu na ọ jọ via na

• Okposo na o te je ru nọ ọloho buobu gbe erara i ro zurie no Ugbehru Mayon ze, onọ o raha iwou buobu nọ e kẹle ugbehru na

• Iwhowho-uvie nọ i te udhusoi buobu a dhẹ no iwou rai

• Oniọvo-ọmọtẹ jọ nọ ọ kpako te ikpe 89 no ọ dina nwoma evaọ okenọ ọ jẹ dhẹ no uwou riẹ nọ o raha muotọ uwhremu na

• Iwou 134 gbe Egwa Uvie 8 e dina raha

• Iwou 75 gbe Egwa Uvie 8 e raha gaga

• Iwou 101 gbe Ọgwa Uvie 1 e raha muotọ

• Esẹro okogho avọ ekpako ukoko nọ e rrọ eria nọ okpẹtu na ọ jọ via na a bi ru iruo kugbe Egbẹgwae Obufihọ kẹ Ahwo nọ Eware Okpẹtu E Via Kẹ ezeza nọ ukoko u ro mu, re a ruẹ nọ inievo mai a wo emu, ame, oria nọ a rẹ rria, gbe eware efa nọ u fo nọ a re wo. Nọ inievo nana a bi fiobọhọ kẹ inievo mai jẹ be tuduhọ ae awọ na yọ a bi koko izi nọ a fihọ kpahe okpẹyao COVID-19 na

Ma te gbẹ hae lẹ roro inievo mai nọ okpẹtu ọgaga nana o te na. Evaọ oke obẹbẹ nana, ma riẹ nọ Jihova ọ te gbẹ jọ “Ọsẹ nọ o wo ohrọ-oriọ gbe Ọghẹnẹ omosasọ kpobi” rọkẹ inievo-emezae gbe emetẹ mai.​—2 Ahwo Kọrint 1:3.