MANILA, Philippines—Ofou-ọwhibo nọ ọ jọ obọ Philippines fou evaọ Edivẹ-Oka, edẹ 4 Akpegbivẹ, 2012 o kpe ahwo nọ a bu vi 1,000, ọ tẹ jẹ raha iwou ahwo nọ a bu te 970,000. Amara nọ o lele i rie yọ Isẹri Jihova a gbe bi fi obọ họ kẹ ahwo nọ eware rai e raha.

Ẹdẹ avọ 7 amara Ọvo, uwou ogha Isẹri Jihova evaọ Manila o tẹ te riẹ nọ ofou-ọwhibo na o kpe Isẹri Jihova isoi. Osẹri ọfa nọ o wiri ugbegbe-uke ọ rrọ ẹsipito. U te no ere no, ofou-ọwhibo na o le iviuwou Isẹri Jihova nọ i bu te 520 no iwou rai keme ọ raha iwou 140 muotọ, ọ tẹ jẹ raha abọjọ iwou nọ i bu te 400.

A vi inievo jọ no uwou ogha kpohọ eria sa-sa nọ ofou-ọwhibo na ọ jọ raha eware na re a riẹ epanọ ọraha na ọ ga te, re a ruẹrẹ utu ogbodhẹ họ, jẹ rọ eme Ebaibol sasa ahwo na oma. Isẹri Jihova a rọ ogbẹgwae obufihọ kẹ ahwo nọ eware okpẹtu e via kẹ ro mu re a ruẹrẹ eria ihrẹ fihọ nọ a te jọ ghale eware kẹ ae.

Evaọ abọjọ orẹwho na, ọwhibo na ọ raha eware nọ ahwo buobu a jẹ rọ ko uviuwou rai, wọhọ idhu isikapa, egbọ iruwo, gbe ibio. Ogbẹgwae na o vi imoto ilogbo nọ e wọ emu buobu se ahwo na. Rekọ a sae wọ emu te oria jọ họ keme ofou-ọwhibo na ọ raha akwa nọ ọ rrọ edhere na no.

Ofou-ọwhibo na ọ raha abọjọ Egwa Uvie 15 nọ Isẹri Jihova a rẹ jọ ru iwuhrẹ rai, jẹ raha ivẹ muotọ. Rekọ Egwa Uvie jọ nọ oware ovo u te he eye ahwo buobu nọ ofou-ọwhibo na o le a dhẹ kpohọ. Ogbẹgwae ogbodhẹ na ọ be daoma gaga re a ruẹ nọ inievo na a wo emamọ oria nọ a rẹ rria.

Unevaze nọ Isẹri Jihova nọ e kẹle oria na a ru gbe onọ a be jọ akpọ na soso ru, oye ogbẹgwae ogbodhẹ na a bi ro fi obọ họ kẹ inievo na. Ugboma Esuo Isẹri Jihova o be hae jọ usu igho unevaze orọ iruo akpọ-soso na fi obọ họ kẹ inievo nọ okpẹtu otiọna o via kẹ.

Dean Jacek, ọtota Isẹri Jihova evaọ Philippines ọ ta nọ: “Uweri o rrọ omai oma fiki inievo Ileleikristi gbe egbẹnyusu mai nọ i whu gbe ọraha nọ ọwhibo na ọ wha ze. Rekọ ma te gbẹ daoma rẹrote inievo mai gbe amọfa jẹ rọ Ebaibol sasa ae oma.”

Inọmba nọ Whọ rẹ Sai Se:

Akpọ-soso: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090