Iruo ogbodhẹ nọ Isẹri Jihova a je ru evaọ Puerto Rico i kuhọ evaọ Azie 2018. Nọ ọwhibo nọ a re se Irma gbe Maria e raha eware evaọ ukoliko Puerto Rico, a te mu iruo na họ evaọ ukpe nọ u lele i rie. Fiki epanọ eware e raha ga te, Isẹri Jihova buobu gbidi gbidi nọ i no America ze e fialoma via kẹ iruo na.

Ogbẹgwae Obufihọ kẹ Ahwo nọ Eware Okpẹtu E Via Kẹ nọ uwou ogha America u ro mu a ru ọruẹrẹfihotọ re iwhowho-uvie nọ i bu te idu ikpe (10,000) evaọ Puerto Rico a kuomagbe iruo na. Inievo-emezae gbe emetẹ efa nọ i bu te idu eree (8,000) a fialoma via kẹ iruo na re. Ejọ rai i no ugbothabọ ze wọhọ Alaska, Bahamas, gbe Hawaii.

Nọ a je ru iruo na, inievo na a ruẹrẹ Egwa Uvie nọ i bu te udhusoi gbe ezeza (106), gbe Egwa Ikokohọ ivẹ nọ ọwhibo na ọ raha. Ofariẹ, a ruẹrẹ iwou inievo mai nọ i bu te egba ihrẹ gbe udhone gbe esa (783), yọ a wariẹ bọ iwou inievo mai nọ i bu te 73. Rekọ egọmeti o fiobọhọ ruẹrẹ iwou inievo jọ. Ofariẹ, ekọmpene insurance nọ ahwo a rẹ hwosa azọhọ-ariẹsehe fihọ i fiobọhọ ruẹrẹ iwou inievo jọ re.

Lorne Kowert nọ ọ rrọ omọvo Ẹko-Iruo Obufihọ kẹ Ahwo nọ Eware Okpẹtu E Via Kẹ evaọ uwou ogha America ọ ta nọ: “Enẹna nọ iruo na i kuhọ no na, eware nọ ma ru evaọ etoke iruo na e te hae bọ inievo nọ ọraha o te oma na ga, yọ o te bọ inievo nọ i fiobọhọ evaọ iruo na ga re.”

Eva e were omai kẹ inievo mai nọ e rrọ Puerto Rico, nọ Jihova ọ rọ rehọ ukoko riẹ fiobọhọ kẹ ae evaọ edhere otiọye.—1 Pita 5:7.