Evaọ amara Ọvo 7, 2020, otọ u nuhu gaga evaọ Puerto Rico. Nọ ọyena ọ vrẹ no, esese efa nọ i te udhusoi buobu e tẹ via lele iei. Evaọ ohiohiẹ Ọvo 11, ọfa nọ ọ nwane rro te ọyena ha u te je nuhu ukoliko na.

Ahwo buobu nọ a rrọ oria yena a ri wo ikpẹ rite enẹna ha, a tẹ jẹ be rria otafe. Uwou ogha United States o ta nọ oniọvo ọvo ọ nwoma hayo whu hu. Rekọ ọraha na o le inievo mai nọ i bu te egba ivẹ gbe udhuvẹ-gberee (248) no iwou rai. Iwou iwhowho-uvie nọ e raha muotọ i te eree, iwou udhosa-gbikpe (70) e tẹ raha omojọ. Egwa Uvie ikpe e raha re. Ogbẹgwae Obufihọ kẹ Ahwo nọ Eware Okpẹtu E Via Kẹ, avọ esẹro okogho nọ i bi fiobọhọ kẹ ae, a ru ọruẹrẹfihotọ nọ a bi ro fiobọhọ kẹ inievo nọ okpẹtu na o via kẹ na, a tẹ jẹ be rehọ ẹme Ọghẹnẹ rọ tuduhọ ae awọ.

Ghelọ eware okpẹtu nana nọ e via na, inievo mai a ruabọhọ be gọ Jihova. Oniọvo nọ a re se Robert Hendriks, nọ ọ be rẹrote iruo Public Information Desk evaọ uwou ogha United States ọ ta nọ: “Oghẹrẹ okpẹtu nana o rẹ kake via evaọ Puerto Rico ho, fikiere otọ nọ u nuhu unuẹse buobu na o be dina lẹliẹ inievo mai ruawa. Rekọ eva e were omai inọ oma o be lọhọ ae he. A be dawo utho ẹgba rai kpobi bi kpohọ iwuhrẹ gbe usi uwoma ota dede nọ a wo ikpẹ ẹlẹtriki hayo ame he. Ekpako na a te je bi weze bru ahwo kpobi nọ a wo ẹgwọlọ jẹ be rehọ ẹme Ọghẹnẹ tuduhọ ae awọ.”

Oghẹrẹ nọ inievo mai a ro se egagọ Jihova gboja ghelọ oware okpẹtu nana nọ o via kẹ ae na o tuduhọ omai awọ kẹhẹ. Ma be lẹ nọ ajọ Jihova o gbe ru udu rai te otọ.—Olezi 119:165.