Evaọ Akpe 21, 2020, * okọto Pervomayskiy nọ o rrọ okpẹwho Omsk u ti bruoziẹ Brọda Sergey Polyakov avọ aye riẹ nọ a re se Anastasia, gbe Sista Gaukhar Bektemirova avọ Dinara Dyusekeyeva. Ọnọ o tu rai ẹdhọ na ọ ta nọ jọ a fi Brọda Polyakov họ uwou-odi ikpe ezeza gbe ubro. Yọ a sai bruoziẹ kpe inievo-emetẹ esa na inọ jọ egọmeti o fiẹrohọ ae evaọ ikpe ivẹ sọ a te wariẹ thọ uzi.

Sergey Polyakov

• Ukpe nọ a yẹ riẹ: 1972 (Ubrotọ Murmansk)

• Iku uzuazọ riẹ: O se kpahe radiophysics evaọ isukulu ilogbo. O wo aye evaọ 2003. Odẹ aye riẹ Anastasia

Anastasia Polyakova

• Ukpe nọ a yẹ riẹ: 1984 (Ubrotọ Murmansk)

• Iku uzuazọ riẹ: Oniọvo nana elọya. Tei te ọzae riẹ Sergey a rẹ gwọlọ wuhrẹ evẹrẹ sa-sa, wọhọ Chinese, Kazakh, ẹvẹrẹ Obọ rọ t’Ẹme Russia, gbe Serbian

Gaukhar Bektemirova

• Ukpe nọ a yẹ riẹ: 1976 (obọ Uryl, Kazakhstan)

• Iku uzuazọ riẹ: Ọye họ ọrọ ọmaha kpobi evaọ usu emọ ezeza nọ ọsẹgboni riẹ o yẹ. A yọrọ e riẹ evaọ ofẹ Kazakhstan nọ igbehru e rrọ, yọ emama Ọghẹnẹ e rẹ were iẹe gaga. Evaọ ikpe buobu, ọ jẹ hae nọ omariẹ oware nọ ma tubẹ ziọ akpọ na ti ru. Uwhremu na ọ tẹ jọ Ebaibol ruẹ iyo enọ nọ e jariẹ udu. Eware nọ ọ romatotọ wuhrẹ evaọ Ebaibol na i bi ru ei wo evawere gbe omosasọ dede nọ a mu rie ekueku

Dinara Dyusekeyeva

• Ukpe nọ a yẹ riẹ: 1982 (obọ Leningradskoye, Kazakhstan)

• Uzuazọ nọ o yeri: Oke nọ ọ jọ ọmaha, ọ jẹ hae nọ omariẹ oware nọ ma tubẹ ziọ akpọ na ti ru. Nọ ọ jọ ikpe ikpegbihrẹ, o te mu Ebaibol họ ewuhrẹ. Ọ ruẹ nọ Ebaibol na yọ obe nọ emamọ ehrẹ e rrọ. Eva e were e riẹ gaga nọ ọ ruẹ nọ Jihova họ odẹ Ọghẹnẹ nọ o wo eme nọ e rrọ Ebaibol na. Erozaha jọ nọ e rẹ were iẹe họ basketball, volleyball, ohrẹ-odhẹ, gbe ebasikoro-edhẹ

Evaọ aso Ahrẹ 4, 2018, nọ Brọda Polyakov avọ aye riẹ Anastasia a jọ owezẹ, iporisi nọ i ku eware ruru ovao e tẹ bẹre ẹthẹ ruọ uwou rai. Nọ a kpe Brọda Polyakov ukpe iyẹ no, a te mu ei avọ aye riẹ nyai fihọ esẹle bẹsenọ a rẹ rehọ ai guẹdhọ. Ae họ ọzae-avọ-aye ọsosuọ nọ a fihọ esẹle anwọ ukpe 2017 nọ Okọto nọ O Mai Kpehru evaọ Russia u bruoziẹ inọ a gbẹ gwọlọ egagọ Isẹri Jihova evaọ ẹkwotọ na ha. Emerae isoi soso a fi Brọda Polyakov họ esẹle riẹ sa, a te je fi aye riẹ họ esẹle riẹ sa re. Kẹsena a te siobọno ai kpo jẹ kpokpa họ ae obọ inọ a re no uwou ze he evaọ emerae esa.

Evaọ Asoi 2019, iporisi e tẹ jẹ vẹruọ iwou Isẹri Jihova buobu evaọ ubrotọ Omsk. Onana u lele uzi egọmeti hi. A mu Sista Bektemirova avọ Dyusekeyeva. A te ku ẹdhọ inievo-emetẹ ivẹ nana gbe orọ Brọda Polyakov avọ aye riẹ. Kẹsena evaọ Ane 1, 2020, a te mu ẹdhọ nọ a tu inievo ene na họ egu.

Ma riẹ nọ Jihova ọ te kẹ idibo riẹ ẹgba nọ a re ro thihakọ okienyẹ nana.—Ahwo Ẹfisọs 3:20.