Evaọ Edisoi-Oka, Ava 14, 2020, okọto Zheleznodorozhniy District Court nọ ọ rrọ Khabarovsk u ti bruoziẹ ẹdhọ Brọda Yevgeniy Aksenov. Ahwo nọ a tu rie ẹdhọ na a gwọlọ nọ okọto na u fi ei họ uwou-odi evaọ ikpe esa.

Evaọ Ane 21, 2018, Brọda Aksenov avọ amọfa jọ a kokohọ ubruwou nọ a rẹ jọ gba ẹgwae evaọ ehọtẹle re a wuhrẹ Ebaibol na. Evaọ ẹdẹ yena, Brọda Aksenov ọ vuẹ ahwo nọ a kokohọ na epanọ ehri-izi Ebaibol na e sai ro fiobọhọ kẹ iviuwou rai. Fiki onana, a tẹ bọwo iẹe ota inọ “ogbulegbu ọ rrọ yọ ọ be wọso ẹwho na” gbe inọ “o bi fiobọhọ kẹ ukoko nọ o be wọso egọmeti ru iruẹru rai.” A mu ẹdhọ na họ evaọ Akpe 21, 2019.

Nọ a bi gu ẹdhọ na kẹle ekuhọ no na, ma be lẹ re Brọda Aksenov avọ uviuwou riẹ a rẹroso Jihova je fievahọ eyaa riẹ inọ “oware ovo” o rẹ kare idibo riẹ hẹ.—Olezi 34:9.