Evaọ Azie 3, 2020, okọto nọ a re se Novozybkov Town Court nọ o rrọ Bryansk Region o bruoziẹ kpe Brọda Vladimir Khokhlov, Sista Tatyana Shamsheva avọ Olga Silaeva, gbe Brọda Eduard Zhinzhikov. Okọto na o bruoziẹ kpe ai inọ ejọ i ti kpohọ uwou-odi evaọ ukpe ọvo efa ukpe ọvo gbe emerae esa. Rekọ, fikinọ a rria uwou-odi te umuo ikpe nọ a brukpe ae na no taure a te ti gu ẹdhọ rai, a te siobọno ae.

Vladimir Khokhlov

• Ukpe nọ A Yẹ Riẹ: 1977 (evaọ Novozybkov, Bryansk Region)

• Iku Uzuazọ Riẹ: Iruo emẹkaniki o re ru. Ọ jọ iruo isoja taure o te ti kurẹriẹ ruọ Osẹri Jihova. Obọro-ofa, obe-use, iyei-ikpe, gbe agita nọ a re kporo e rẹ jẹ were iẹe

• Ogbẹnyusu riẹ jọ ọ tuduhọ iẹe awọ nọ o wuhrẹ Ebaibol na. Ọ rọo Olga evaọ 2007. A yẹ ọmọtẹ nọ a re se Anastasia. Ahwo uviuwou na kpobi a be gọ Jihova

Tatyana Shamsheva

• Ukpe nọ A Yẹ Riẹ: 1977 (evaọ Cherepovets, Vologda Region)

• Iku Uzuazọ Riẹ: O wo idigri evaọ economist. Ọ jọ isukulu wuhrẹ economics, law, gbe accounting no evaọ ikpe buobu. Ọ họ-ame evaọ 1995. O rẹ were iẹe re o dhesẹ emamọ ehrẹ nọ e rrọ Ebaibol na kẹ amọfa

Olga Silaeva

• Ukpe nọ A Yẹ Riẹ: 1988 (evaọ Davydovo, Moscow Region)

• Iku Uzuazọ Riẹ: Ọye họ ubreyẹ emọ esa nọ oni riẹ o yẹ. Ọ jọ isukulu wo idigri evaọ thermal engineering. Ẹguede avọ olulu nọ a re ro zuo eware o rẹ were iẹe gaga. Obe-use gbe oghẹrẹ obọro nọ a rẹ rọ obọ fa nọ a re se volleyball o rẹ were iẹe re. Oni riẹ ọ rọ aro kele mu Ebaibol na họ ewuhrẹ, yọ eware nọ o wuhrẹ na e were riẹ gaga

Eduard Zhinzhikov

• Ukpe nọ A Yẹ Riẹ: 1971 (evaọ Zadnya, Bryansk Region)

• Iku Uzuazọ Riẹ: O je ru iruo ewẹda, rẹrote iwou ahwo, o te je ru iruo kẹ iporisi no. Ọ jọ utu ile ikporo jọ vẹre. Ọ rọo Tatyana, ọnọ a gbẹ jọ utu ile ikporo na evaọ 1993. Eme-ọketa nọ a re kere gbe agita nọ a re kporo e rẹ were iẹe

• O mu Ebaibol na họ ewuhrẹ taure ukpe 2000 o te ti te, yọ Ebaibol nọ o je wuhrẹ na o kuyo enọ buobu nọ o wo. Iyo enọ yena no ọ ruẹ na i ru nọ o ro siobọno ikpehre iruemu riẹ je ru nọ uzuazọ uviuwou riẹ u ro woma. Oghẹrẹ nọ o ro nwene u gbe aye riẹ, Tatyana, unu gaga. Fikiere, o te kurẹriẹ ruọ Osẹri Jihova re

Evaọ Azeza 11, 2019, ahwo egọmeti a vẹ ro iwou Isẹri Jihova udhegbivẹ evaọ ubrotọ Bryansk evaọ Russia. Fikiere a te mu Sista Tatyana Shamsheva avọ Olga Silaeva. Ae omomọvo a jọ uwou-odi nọ a re fi ahwo họ taure a te ti gu ẹdhọ rai edẹ egba ivẹ gbe udhuvẹ-gbisoi (245). A siobọno ae evaọ Asoi 2020, onọ u ru nọ a sai ro kpobọ iwou rai, be hẹrẹ okenọ a ti ro gu ẹdhọ rai.

Evaọ Akpe 16, 2019, ahwo egọmeti a tẹ wọ eku họ Brọda Vladimir Khokhlov avọ Eduard Zhinzhikov uzou inọ ahwo ugbarugba a rrọ. Uwhremu na a te ku ẹdhọ rai na kugbe orọ Sista Shamsheva avọ Silaeva. Edẹ ihrẹ nọ i lele i rie, a te fi inievo-emezae ivẹ na họ uwou-odi nọ a re fi ahwo họ taure a te ti gu ẹdhọ rai.

A jọ Iyẹrẹ 2020 nọ I No Obọ Utu Ẹruorote na Ze, Ọrọ avọ 5 kiẹ inievo-emetẹ ivẹ na riwi. Sista Silaeva ọ ta nọ emerae eree nọ ọ jọ uwou-odi taure a te ti gu ẹdhọ riẹ na u ru nọ o ro vuhumu nọ “ghele oghẹrẹ nọ eware e rẹ ga te kẹhẹ, Jihova ọ rẹ rọ ẹzi ọfuafo riẹ fiobọhọ kẹ omai ẹsikpobi re ma sai thihakọ ebẹbẹ na.” Sista Shamsheva ọ ta ududu nọ: “Jihova ọ rrọ gbomai ẹsikpobi, ọ te tha omai uke ẹsikpobi, ọ te bọ omai ga je fiobọhọ kẹ omai.”

Ma riẹ nọ Jihova o ti gbe fiobọhọ kẹ inievo-emezae gbe erọ emetẹ mai nọ a sai fihọ uwou-odi hayo enọ e rro uwou-odi no enẹna evaọ Russia re a thihakọ odawọ nana avọ oghọghọ gbe udhedhẹ.—1 Ahwo Kọrint 10:13.