Nọ a nwani bruoziẹ kpe Brọda Dennis Christensen no, edẹ izii nọ i lele i rie, a gboja kẹ Isẹri Jihova nọ i te ihrẹ, o tẹ kawo. A rehọ ẹlẹtriki shọko rai, a rehọ oware gba ovao rai nọ a gbẹ sae rọ wẹ ziezi hi, a te je kpe ae ukpe-ẹsọ. Ahwo egọmeti Russia ae a ru rai eware nana kpobi evaọ ẹwho jọ nọ a re se Surgut. Nọ a je gboja kẹ ae na, yọ a be nọ ae eria nọ a re jo kokohọ ru iwuhrẹ gbe edẹ Isẹri Jihova efa.

Oware nana u muhọ ẹvia evaọ ohiohiẹ edẹ 15 Ava, 2019, nọ ahwo egọmeti nọ e rrọ Surgut a vẹruọ iwou inievo mai. A mu inievo na jọ jẹ rehọ ae kpohọ ọfisi rai, kẹsena a te mu ai enọ họ ẹnọ. Rekọ inievo na a rowo nọ a rẹ vuẹ ae oware ovo kpahe Isẹri Jihova ibe rai hi. Nọ elọya nọ o dikihẹ kẹ ae ọ nwane nyavrẹ no, inievo na a ta nọ a te mu ae họ ẹlahiẹ: ahwo egọmeti na a tẹ gba ẹkpa họ uzou rai, gba abọ rai fihọ emu, je mu ae họ ekpe. A tẹ ba inievo na fihọ jẹ kpare ame ku ae, kẹsena a tẹ rehọ ẹlẹtriki shọko rai. Olahiẹ nana u kri te euwa ivẹ.

O tẹ kawo, Isẹri Jihova esa a gbẹ rrọ uwou-odi. Enọ a siobọno a kpohọ ẹsipito re a siwi oma rai fiki oma nọ a nwa, a tẹ jẹ rehọ ẹme na kpohọ ekọto.

Ofariẹ, nọ ahwo egọmeti a kiẹ iwou inievo mai kpobi no, egọmeti Russia o te tu inievo mai nọ i bu te 19 kpohọ ekọto, be bọwo ae ota inọ a bi wobọ evaọ iruẹru ukoko nọ o be “wọso egọmeti” jẹ “lẹliẹ ahwo ru ozighi.”

Evaọ uzi Russia, re a gboja kẹ ohwo enẹ yọ oware nọ o wọso uzi. Ofariẹ, orẹwho Russia ọ rrọ usu erẹwho buobu evaọ akpọ na, enọ i wo izi nọ e ta nọ o thọ re a lahiẹ ohwo. Fikiere ma te gwọlọ edhere kpobi nọ ma rẹ rọ rehọ ẹme na kpohọ ekọto evaọ Russia gbe erẹwho efa fiki okienyẹ nana.

Maero na, ma riẹ nọ Jihova ọ be ruẹ ukpokpoma nọ u bi te inievo mai evaọ Russia, yọ o ti ru oware jọ kpahe iẹe keme ọye họ ‘ofiobọhọ rai gbe osiwi rai.’—Olezi 70:5.