Evaọ Azie 16, 2020, * okọto nọ a re se Sverdlovskiy District Court nọ o rrọ okpẹwho Kostroma o ti whowho oziẹ nọ o bru kpahe Brọda Sergey Rayman avọ aye riẹ, Valeriya. A te brukpe ai, a ti kpohọ uwou-odi hi, rekọ ahwo egọmeti a te hai fiẹrohọ ai evaọ etoke ikpe ihrẹ. Nọ a jẹ thọ uzi egọmeti jọ evaọ etoke nana, a ve fi ai họ uwou-odi.

Sergey Rayman

• Ukpe nọ A Yẹ Riẹ: 1996 (evaọ Kineshma, Ivanovo Region)

• Iku Uzuazọ Riẹ: O wuhrẹ kpahe oghẹrẹ nọ a rẹ rọ bọ iwou evaọ obọ isukulu. Fikiere ọ riẹ kpahe oghẹrẹ nọ a re ro ru eware onaa fihọ iwou ziezi. Oni nọ o yẹ oni riẹ họ ohwo nọ o wuhrẹ i rie kpahe Ebaibol na, fikiere o rri Ebaibol na ghaghae. Ọ rọo Valeriya evaọ 2015. Ẹbẹ-othere gbe arozaha nọ a rẹ rọ whra evaọ ehru ekpalekpa-ame e rẹ were iẹe

Valeriya Rayman

• Ukpe nọ A Yẹ Riẹ: 1993 (evaọ Sharya, Kostroma Region)

• Iku Uzuazọ Riẹ: Ọsẹ riẹ o whu nọ ọ jọ ikpe ikpe. Oni riẹ họ ọnọ o wuhrẹ i rie kpahe Jihova. O re ru eto, yọ o wo elasisi

Evaọ irioke frifri Ahrẹ 25, 2018, iporisi nọ i kru igbeke họ obọ a tẹ rọ ayọno ologbo jọ rọ bẹre ẹthẹ uwou Brọda Rayman avọ aye riẹ rueva. A te mu aimava. A fi Sista Rayman họ uwou-odi edẹ ivẹ. A te fi Brọda Rayman họ uwou-odi nọ omọvo ọ rẹ jọ goli edẹ udhuvẹ gbe ikpegbizii. Ahwo egọmeti na a whaha e rai nọ a lele Isẹri Jihova efa ta ẹme he. U te no ere no, a kẹ rai uvẹ nọ a re ro no uwou rai evaọ owọwọ họ. Oware nana nọ o be via na u ru nọ eware e rọ rrọ bẹbẹ kẹ ai, yọ o be kẹ ai uye gaga.

Nọ ọzae-avọ-aye nana a be hẹrẹ oziẹ nọ okọto na o ti bru na, ma lẹ nọ jọ a wo udu je kru oma ga, re a je fievahọ Jihova inọ ọ te thọ ai uke ẹsikpobi.—Joshua 1:9.