Evaọ Azie 25, 2020, * okọto nọ a re se Yelizovsky District Court nọ o rrọ Kamchatka Territory o ti whowho oziẹ nọ o bru kpahe Brọda Konstantin Bazhenov, aye riẹ, Snezhana, gbe Sista Vera Zolotova. Ahwo egọmeti na a gwọlọ nọ okọto na o ho Brọda Bazhenov avọ Sista Bazhenov 600,000 rubles (koyehọ ₦3,013,536:05), re a je ho Sista Zolotova 400,000 rubles (koyehọ ₦2,009,664:15).

Konstantin Bazhenov

• Ukpe nọ A Yẹ Riẹ: 1977 (evaọ Petropavlovsk-Kamchatsky, Kamchatka Territory)

• Iku Uzuazọ Riẹ: Ọye họ ọmọ ọkpako evaọ usu emọ ene nọ ọsẹgboni riẹ a yẹ. O je ru iruo emẹkaniki, ọ tẹ jẹ jọ iticha. Iyei-ikpe e rẹ were iẹe

• Ọ rọo Snezhana evaọ 2001, yọ iticha ọ jọ re. A yẹ ọmọtẹ ọvo nọ a re se Elizabeth. Aikpobi a be gọ Jihova

Snezhana Bazhenova

• Ukpe nọ A Yẹ Riẹ: 1977 (evaọ Shikotan Island, Sakhalin Oblast)

• Iku Uzuazọ Riẹ: Oni riẹ ọvo ọ yọrọ e riẹ. Emọ e rẹ were iẹe gaga, yọ o rẹ were iẹe re o wuhrẹ emaha na. Enẹna, fiki eku nọ a wọ fihọ iẹe uzou inọ ohwo ugbarugba ọ rrọ na, a gbẹ be kẹe uvẹ re o wuhrẹ emaha na ha

• Oni-ode riẹ họ ọnọ o wuhrẹ i riẹ kpahe Ọghẹnẹ gbe epanọ a rẹ lẹ. Onana u fiobọhọ kẹe wo uyoyou kẹ Ọghẹnẹ gbe Ebaibol na

Vera Zolotova

• Ukpe nọ A Yẹ Riẹ: 1946 (evaọ Yelizovo, Kamchatka Territory)

• Iku Uzuazọ Riẹ: Uviuwou nọ ahwo riẹ a jọ buobu ọ jọ whẹro. Ọ rọo Yuri Zolotov evaọ 1966. A yẹ emọ ivẹ. Ọ jẹ hai ru iruo okele-igho vẹre. Igbehru nọ a rẹ gadiẹ, gbe arozaha nọ a rẹ rọ whra evaọ ehru ekpalekpa-ame e rẹ were iẹe gaga

• Evaọ ikpe buobu, ọ jẹ gwọlọ epanọ ọ rẹ rọ riẹ Ọghẹnẹ. O kpohọ egagọ sa-sa. Eva e were riẹ gaga nọ o wuhrẹ nọ Ọghẹnẹ o kiẹrẹe je you ahwo kpobi. Ọzae riẹ ọ jọ Osẹri Jihova ha. Rekọ, oghẹrẹ nọ Ebaibol na u ro fiobọhọ kẹ aye riẹ o were riẹ gaga

Evaọ Aria 19, 2018, iporisi a kiẹ iwou esa erọ Isẹri Jihova evaọ ẹwho Yelizovo. A mu inievo-emezae gbe erọ emetẹ mai ikpegbọvo. A jẹ nọ ae enọ evaọ euwa buobu. Uwhremu na, a te siobọno inievo eree. Rekọ ahwo egọmeti na a te wọ eku fihọ Brọda Bazhenov, aye riẹ, gbe Sista Zolotova uzou inọ ahwo ugbarugba a rrọ. Fikiere, a te fi ai họ uwou-odi nọ a re fi ahwo nọ mu họ evaọ ubroke. Nọ edẹ ivẹ e vrẹ no, a te siobọno inievo-emetẹ na. Obruoziẹ jọ ọ tẹ kẹ udu inọ a siobọno Brọda Bazhenov hu. Rekọ, edẹ eree nọ i lele i rie a te siobọnoi.

Nọ a be hẹrẹ oziẹ nọ a ti bru na, ma be lẹ nọ Brọda Bazhenov avọ aye riẹ gbe Sista Zolotova a ti gbe fi eva rai kpobi họ Jihova. Ebaibol na ọ kẹ omai imuẹro inọ Jihova ọ te kẹ ahwo riẹ nọ e talamu ei oghọghọ gbe udhedhẹ, “re ẹruore rai ọ ruẹse jọ gaga ẹkwoma ogaga ẹzi ọfuafo na.”—Ahwo Rom 15:13.