Evaọ Akpe 23, 2020, * okọto nọ a re se Oktyabrsky District Court nọ o rrọ Kirov o ti whowho oziẹ nọ o bru kpahe Brọda Anatoliy Tokarev. A sai fi ei họ uwou-odi te ikpe esa gbe ubro.

Anatoliy Tokarev

• Ukpe nọ A Yẹ Riẹ: 1958 (evaọ Baranovskaya, Kirov Region)

• Iku Uzuazọ Riẹ: Oni riẹ ọ yọrọ e riẹ. Taure ọ tẹ te retaya no iruo nọ o je ru, ọ jọ software engineer. Ifoto nọ a rẹ rehọ e rẹ were iẹe, yọ ọ riẹ arozaha nọ a re se chess e te, ọ tẹ jẹ riẹ akpata-ifi e kporo. Ọ rọo Margarita evaọ 1979. A yẹ emọ ivẹ

• Fikinọ ọ riẹ esayẹnse gaga ọ rọwo nọ Ọghẹnẹ ọ rrọ họ. Rekọ nọ ọ jọ ikpe udhegbihrẹ Isẹri Jihova a te mu ei Ebaibol na họ ewuhrẹ, ọ tẹ te ruẹ vevẹ nọ eme nọ e rrọ Ebaibol na avọ esayẹnse e rọwokugbe ohwohwo

Evaọ Asoi 24, 2019, utu ahwo egọmeti nọ a re se Russia’s Center for Countering Extremism a tẹ vẹ ro ighẹ Brọda Tokarev. Ahwo egọmeti na a tẹ rehọ Brọda Tokarev lawhe je mu ei enọ họ enọ. A ta nọ a ti tu ahwo uviuwou Brọda Tokarev ẹdhọ kpohọ okọto otẹrọnọ ọ gbẹ rọwo nọ ọyomariẹ o bi wobọ evaọ iruẹru ahwo nọ a re ru ozighi re ahwo a wọso egọmeti hi. Rekọ onana yọ eku gheghe nọ a wọ fihọ iẹe uzou. Kẹsena a te mu Brọda Tokarev vrẹ kpohọ obonọ a rẹ jẹ nọ ahwo enọ re a nọe enọ.

Enwene emerae isoi nọ i lele rie, a tẹ wọ eku họ Brọda Tokarev uzou inọ ọ thọ izi jọ nọ e rrọ obe uzi rai nọ a re se Criminal Code of the Russian Federation. A tẹ jẹ wọ eku fihọ iẹe uzou inọ ọ be rehọ igho kẹ ahwo re a ru ozighi wọso egọmeti. Ahwo egọmeti nọ a mu rie na a be jẹ rehọ eme nọ a lẹlẹ rekọdo evaọ ighẹ riẹ ro kru rie inọ o bi koko ahwo họ re a wuhrẹ ebe nọ egọmeti o fi awhaha họ inọ yọ ebe ahwo nọ a re ru ozighi re ahwo a wọso egọmeti.

Ma be lẹ roro Brọda Tokarev avọ ahwo uviuwou riẹ kpobi. Ma riẹ nọ Jihova ọ te nyasiọ ae ba vievie he, ọ te “talamu” ae ẹsikpobi.​—Olezi 18:25.