Azie 2, 2020, * evaọ Berezovsky City Court nọ o rrọ Kemerovo Region

A sai fi ai họ uwou-odi ikpe ezeza gbe ubro

Sergey Britvin

• Ukpe nọ A Yẹ Riẹ: 1965 (Kemerovo Region)

• Iku Uzuazọ Riẹ: Evaọ ikpe buobu ọ jẹ rọ ikreni ru iruo, yọ ọ jẹ hae dhẹ omoto ologbo. O no iruo yena nọ o je ru na fiki ẹyao. Arozaha oma u ru jaja e rẹ were iẹe gaga

• Ọ rọo Natalya evaọ ukpe 1992. O mu Ebaibol na họ ewuhrẹ evaọ ukpe 1995 nọ o yo kpahe eyaa Ọghẹnẹ kpahe ẹkparomatha na. Nọ ikpe buobu e vrẹ no, aye riẹ Natalya, o te mu Ebaibol na họ ewuhrẹ re. O mu Ebaibol na họ ewuhrẹ nọ ọ ruẹ ẹrọwọ nọ ọzae riẹ Sergey o wo gbe epanọ Ebaibol na o ro fiobọhọ kẹe ru inwene buobu evaọ uzuazọ riẹ

Vadim Levchuk

• Ukpe nọ A Yẹ Riẹ: 1972 (Kemerovo Region)

• Iku Uzuazọ Riẹ: Uviuwou nọ o rrọ egagọ ọvuọvo ho ọ jọ whẹro. Ọ jọ ohwo nọ ọ rẹ tọ igoru evaọ etoke ikpe 14

• O mu Ebaibol na họ ewuhrẹ evaọ ukpe 1992. Ọ rọo Tatiana evaọ ukpe 1997. A yẹ emezae ivẹ. Ahwo uviuwou na kpobi a rri Ebaibol na ghaghae. Arozaha oma u ru jaja gbe oghẹrẹ erozaha efa e rẹ were ae gaga re

Evaọ Ahrẹ 22, 2018, iporisi nọ a re se Federal Security Service (FSB) a vẹ ro iwou eree inievo mai evaọ okpẹwho Berezovsky. Fikiere a te mu Brọda Britvin avọ Levchuk je mu ai enọ họ enọ. Kẹsena Central District Court of Kemerovo o tẹ ta nọ a fi inievo ivẹ na họ uwou-odi bẹsenọ a re gu ẹdhọ rai. A jọ uwou-odi na enwenọ ukpe ọvo gbe ubro. Evaọ Akpegbivẹ 25, 2019, a tẹ wọ ae no uwou-odi na kpobọ uwou rai je mu ai fihọ uwou nọ a du no uwou ze he, yọ etẹe a rrọ rite enẹna.

Brọda Britvin avọ Levchuk yọ inievo ivẹ evaọ usu inievo isoi nọ a bi ro gu ẹdhọ evaọ Kemerovo Region inọ a thọ uzi fikinọ Isẹri Jihova a rrọ. Ma bi roro kpahe inievo-emezae gbe erọ emetẹ mai kpobi nọ a fihọ uwou-odi evaọ obọ Russia jẹ be lẹ roro ai. Ahwo Hibru 13:3 o kareghẹhọ omai nọ: “Wha hai wo enọ e rrọ uwou-odi họ iroro wọhọ ẹsenọ a fi owhai họ uwou-odi kugbe ai, gbe enọ a be lahiẹ, nọ orọnọ whai omarai wha rrọ ugboma na re na.”