Evaọ Akpegbọvo 24, 2020, * okọto nọ a re se Petropavlovsk-Kamchatskiy City Court nọ o rrọ Kamchatka Territory o ti whowho oziẹ nọ o bru evaọ ẹdhọ Brọda Sergey Ledenyov. A sai fi ei họ uwou-odi te ikpe ezeza.

Sergey Ledenyov

• Ukpe nọ A Yẹ Riẹ: 1974 (evaọ Ossora, Kamchatka Region)

• Iku Uzuazọ Riẹ: Emọ ezeza oni riẹ o yẹ. Eware nọ a rẹ drọ gbe ifoto nọ a rẹ rehọ e rẹ were iẹe gaga. Ọ rẹ bọ iwou je ru iruo etaele. Vẹre vẹre, o je roro nọ Ebaibol na yọ obe nọ u kiekpo no nọ o rọwokugbe otọkiẹ-eriariẹ hẹ, bẹsenọ Isẹri Jihova a ro wuhrẹ Ebaibol na kugbei. Ọ rehọ aye riẹ, Anna, evaọ 2017. Aye riẹ, Anna, ọ ta nọ ehrẹ Ebaibol nọ ọzae riẹ, Sergey, o bi ru lele u ru nọ ọ rọ rrọ dhedhẹ, yoyou, jẹ rrọ emamọ ọzae

Evaọ Akpegbivẹ 2, 2018, utu iporisi nọ e rọ oware gba ovao je kru igbeke a vẹ ruọ uwou Brọda Ledenyov evaọ Petropavlovsk-Kamchatskiy. A te mu ei jẹ ta nọ ọ thọ uzi Article 282.2 of the Russian Criminal Code. A te mu ẹdhọ na họ egu evaọ Akpegbọvo 28, 2019.

Evaọ Akpegbivẹ 12, 2019, okọto Petropavlovsk-Kamchatskiy City Court nọ o rrọ Kamchatka Territory o te zihe ẹdhọ na se ohwo egọmeti nọ o tu ẹdhọ na. Okọto o sai zihe ẹdhọ nọ o tẹ ruẹ nọ oware ovo o riẹ nọ a sai ro kru ohwo na nọ o ruthọ họ. Rekọ evaọ Ava 4, 2020, okọto nọ u kpehru vi ọyena o te nwene oziẹ na jẹ mu ẹdhọ na họ egu. Evaọ ẹdẹ nọ a je gu ẹdhọ na, ahwo egọmeti na a jẹ nọ aye Brọda Ledenyov gbe oniọvo-ọmọtẹ ọfa jọ enọ, be gbae họ re a se isẹri ọrue kpe Brọda Ledenyov. Sista Ledenyov avọ oniọvo-ọmọtẹ na a se thahe thahe inọ a re se isẹri ọrue he.

Imoni Broda Ledenyov nọ e rrọ Isẹri Jihova ha a wo otoriẹ oware nọ a bi ro kpokpo omoni rai fiki oware nọ ọ rọwo ho.

Ma be lẹ roro Brọda Ledenyov avọ aye riẹ nọ a be hẹrẹ ẹdẹ nọ a ti ro bruoziẹ na. Ma fievahọ Jihova inọ ẹzi riẹ ọ te jarai oma.—1 Pita 4:14.