Evaọ Akpe 7, 2020, * okọto nọ a re se Mayskiy District Court nọ o rrọ Kabardino-Balkarian Republic o ti whowho oziẹ nọ o bru kpahe Brọda Yuriy Zalipayev. A sai fi ei họ uwou-odi ikpe ivẹ.

Yuriy Zalipayev

• Ukpe nọ A Yẹ Riẹ: 1962 (Samara)

• Iku Uzuazọ Riẹ: O je ru iruo ewẹda yọ ọ jẹ hae dhẹ omoto ologbo re. Eme eketa gbe igbehru nọ a rẹ gadiẹ e rẹ were iẹe

• Ọ rọo Natalia evaọ 1983, yọ aimava a jọ eklase ọvona evaọ okenọ a jọ emaha. Nọ a rọo no, ikpe ikpe nọ i lele i rie, aimava a te mu Ebaibol na họ ewuhrẹ. A yẹ emọ esa. Aikpobi a be gọ Jihova, yọ imoni rai jọ a be gọ Jihova re

Evaọ Aria 20, 2016, ahwo egọmeti a vẹ ro Ọgwa Uvie jọ evaọ Mayskiy jẹ lẹlẹ si ebe mai jọ nọ egọmeti o fi awhaha họ fihọ eva Ọgwa Uvie na. Dede nọ inievo na a wo ividio nọ i dhesẹ nọ ahwo egọmeti na ọvo a lẹlẹ si ebe na no họ Ọgwa Uvie na, okọto na o ho ukoko na 200,000 rubles (koyehọ ₦1,009,480:05) ghele, inọ inievo na a thọ uzi. Emerae jọ nọ i lele i rie, ahwo egọmeti na a tẹ wọ eku fihọ Brọda Zalipayev uzou inọ ohwo ugbarugba ọ rrọ, a te mu ei fiki oware nọ o via ẹdẹ yena.

Ahwo egọmeti nọ a mu rie na a ta nọ Brọda Zalipayev ọ jẹ rehọ ebe nọ egọmeti o fi awhaha họ no rọkẹ ahwo, ọ tẹ jẹ be tuduhọ Isẹri Jihova efa awọ re a họre ahwo egagọ efa. A ta nọ eware nana nọ o ru na yọ eware nọ uzi o ta nọ e thọ. Yọ a re se uzi nọ a ta nọ ọ thọ na “public calls for extremist activities” koyehọ, “re a tuduhọ amọfa awọ dhomahọ iruẹru ozighi” (Part 1 of Article 280 of Russia’s Criminal Code).

A mu ẹdhọ na họ egu evaọ Azeza 21, 2020. Evaọ etoke ẹdhọ na, ahwo nọ a je se isẹri kẹ ahwo egọmeti nọ a mu rie na a jẹ ta eme nọ e wọso ohwohwo, onọ u dhesẹ nọ eku gheghe a be wọ fihọ oniọvo na uzou na. Wọhọ oriruo, a jọ udevie ẹdhọ na ruẹ nọ ahwo jọ evaọ usu ahwo nọ a bi se isẹri inọ a yo nọ Brọda Zalipayev ọ jẹ tuduhọ ahwo awọ re a ru ozighi na a tubẹ jọ oria nọ a ta nọ ọ jọ jẹ ta eme nana ha. U te no ere no, ejọ evaọ usu ahwo nọ a bi se isẹri na a ta nọ ebe nọ a fi awhaha họ nọ a ruẹ evaọ Ọgwa Uvie na, ahwo egọmeti na họ enọ e lẹlẹ fi ebe na họ etẹe.

Nọ Brọda Zalipayev ọ be hẹrẹ oziẹ nọ a ti bru na, ma be lẹ nọ eme nana nọ Devidi ọ ta evaọ Ebaibol na e kẹ ọyomariẹ avọ ahwo uviuwou riẹ ẹgba gbe udhedhẹ, oria na o ta nọ: “Jihova họ ẹgba mẹ gbe ojese mẹ; ọye me fi udu mẹ họ. O fiobọhọ kẹ omẹ no, udu mẹ o tẹ be ghọghọ.”—Olezi 28:7.