Evaọ Ẹdọvo-Oka, Aria 3, 2020, okọto Pskov o ta nọ jọ a si Brọda Gennady Shpakovskiy no uwou-odi. Okọto na u bruoziẹ kpei vẹre inọ a fi ei họ uwou-odi evaọ ikpe ezeza gbe ubro. Rekọ obọnana, okọto na o tẹ ta nọ dede nọ oniọvo na ọ gbẹ reabe, ọ sai kpo. Ghele na, egọmeti o ti gbe fiẹrohọ iẹe evaọ unuikpe yena nọ ọ jẹ te rria uwou-odi na sọ ọ te gbẹ thọ uzi egọmeti. Nọ okọto na o ta ere no, umutho euwa jọ e jẹ vrẹ no, a te siobọno Brọda Shpakovskiy. Ahwo nọ a si obe sei na a sae wariẹ tu ẹdhọ na nọ a tẹ gwọlọ ru ere.