Evaọ Azie 29, 2020, * okọto nọ a re se Pervorechenskiy District Court evaọ Vladivostok o ti bruoziẹ Sista Yelena Barmakina nọ a bi ro guẹdhọ. A rẹ sai brukpei nọ a ti fi ei họ uwou-odi ikpe esa, nọ oke nọ a fihọ u te te. Nọ Sista Barmakina ọ be hẹrẹ re a bruoziẹ riẹ na, yọ a gbẹ be rọ ọzae riẹ nọ a re se Dmitriy ro guẹdhọ fiki ẹme ọfa jọ.

Yelena Barmakina

• Ukpe nọ A Yẹ Riẹ: 1967 (evaọ Cherepanovo, Novosibirsk Region)

• Iku Uzuazọ Riẹ: Ọye ọ be rẹrote ọsẹgboni riẹ nọ a kpako no gbe oni ologbo riẹ. O rẹ were iẹe gaga re ọ rehọ ifoto, yọ iruo nọ o bi ru eye. O rẹ jẹ were iẹe re ọ ya ame jẹ gadiẹ igbehru

• No Isẹri Jihova a mu Ebaibol na họ ewuhrẹ kugbei no, u te mu ei ẹro nọ eruẹaro Ebaibol na nọ i rugba no i dhesẹ nọ Ọghẹnẹ o wo ogaga. Ẹrọwọ riẹ o te je dhe ẹgẹga nọ ọ ruẹ epanọ Jihova ọ be rọ kuyo elẹ riẹ. Ukpe 2003, o ro wo ọzae riẹ nọ a re se Dmitriy.

Evaọ ighọjọ 7 ohiohiẹ evaọ Ahrẹ 28, 2018, iporisi nọ e wha igbeke yọ a ku eware họ ovao a tẹ bẹre ruọ uwou oni ologbo Sista Yelena Barmakina nọ ọ kpako te ikpe 90 soso no. Evaọ oke yena yọ Sista Barmakina avọ Dmitriy ọzae riẹ a jọ kugbe oni na jẹ rẹrotei. A te mu Brọda Barmakina je fi ei họ uwou-odi bẹsenọ a re gu ẹdhọ riẹ. Iporisi na a je seha kẹ Sista Barmakina nọ, “Whẹ u bi ti te na!”

Nọ ukpe ovo o vrẹ no, ahwo egọmeti na a te ru re Sista Barmakina ọ gbẹ sae rehọ ugho evaọ akanto riẹ evaọ ebanke he. Evaọ Aria 6, 2019, ohwo egọmeti jọ nọ ọ rrọ okegbe rai o te si obe kẹ Sista Barmakina fikinọ ọ be lẹ, bi se Ebaibol, je bi rri ividio evuẹ nọ a kẹ no Ebaibol ze. Elọya nọ o dikihẹ kẹ Sista Barmakina ọ tẹ ta nọ a kpare ẹdhọ na kufiẹ keme a rẹ rọ fiki eware itieye na gu ohwo ẹdhọ họ, yọ eware nọ ohwo kpobi ọ rẹ sai ru evaọ egagọ riẹ. Rekọ obruoziẹ na ọ jọ abọ ohwo egọmeti na jẹ ta nọ Sista Barmakina ọ thọ uzi orẹwho Russia nọ o ta kpahe iruẹru nọ i dhesẹ nọ ohwo ọ be wọso egọmeti.

Edhọ nana nọ a be rọ Sista Barmakina gu inọ ogbulegbu ọ rrọ na e wha awaọruọ ọgaga avọ uye fihọ iẹe oma no. Evaọ ẹgbukpe gbe edẹ ikpegbezeza soso, ọ jọ kugbe ọzae riẹ hẹ fikinọ a fi rie họ uwou-odi taure a te ti gu ẹdhọ riẹ. Yọ fikinọ o gba Sista Barmakina họ nọ ọ rẹ jariẹ oke kpobi nọ a tẹ gwọlọ gu ẹdhọ na hayo kiẹe riwi, u wo iruo buobu nọ ọ rẹ sai ru hu.

Wọhọ epanọ ma wuhrẹ no evaọ Ebaibol na, u bi gbe omai hu inọ ahwo egọmeti Russia a be daoma rai kpobi re a “gele” inievo mai kie no ẹrọwọ rai. Rekọ eva e be were omai nọ ma rọ riẹ nọ Jihova ọ te gbẹ jọ “uwou” rọkẹ ae jẹ kẹ ae “ẹgba.”—Olezi 118:13, 14.