Evaọ Ava 4, 2020, okọto Zheleznodorozhniy nọ o rrọ Khabarovsk evaọ Russia u ti bruoziẹ ẹdhọ Brọda Stanislav Kim avọ Nikolay Polevodov. Elọya egọmeti na ọ gwọlọ nọ a re brukpe inievo na re a fi ai họ uwou-odi ikpe esa nọ a rẹ jọ ru iruo ọgbahọ. U te no ere no, a tu inievo na ẹdhọ kpohọ okọto ọfa jọ nọ a re se Industrial District Court evaọ okpẹwho ọvona.

A mu Brọda Kim avọ Polevodov evaọ Akpegbọvo 10, 2018. Evaọ ẹdẹ yena, inievo nọ i bu vi udhuvẹ-gbikpe a kokohọ ehọtẹle ọsese jọ nọ a haya re a re emu jẹ wereva kugbe. Orọnikọ a kokohọ kẹ egagọ họ. U ri kri hi na, iporisi buobu gbe ahwo egọmeti efa nọ e rẹ kiotọ eware a te du ruọ ehọtẹle na, a te mu ahwo nọ a jọ etẹe na. A te fi Brọda Kim avọ Polevodov gbe Brọda Vitaliy Zhuk họ uwou-odi, yọ a jọ etẹe kri vrẹ emerae ivẹ be hẹrẹ oke nọ a ti ro guẹdhọ rai. Nọ a siobọno ae a te fi uzi họ kẹ ae nọ a re no uwou ze he evaọ emerae buobu.

Oziẹ nọ a ti bru evaọ Ava 4 na yọ ọrọ ẹdhọ Brọda Kim avọ Polevodov ọvo. A tu rai ẹdhọ na fikinọ a jọ ehọtẹle nọ inievo na a jọ kokohọ na. U te no oyena no, ahwo egọmeti a tu Brọda Kim, Polevodov, gbe Zhuk, avọ inievo-emetẹ esa efa nọ e jọ usu ahwo nọ a kokohọ ehọtẹle na evaọ ẹdẹ yena ẹdhọ inọ igbulegbu a rrọ. Oware nọ a ro tu ae ẹdhọ nana họ, ahwo egọmeti na a ta nọ Brọda Kim avọ Polevodov họ ahwo nọ a koko inievo na họ etẹe. A ri fi ẹdẹ nọ a ti ro bruoziẹ ẹdhọ nana họ no ho.

Oware nana nọ Brọda Kim avọ Polevodov a be rẹriẹ ovao dhe na u yoma gaga keme edhọ ivẹ soso a be rehọ ai gu na inọ igbulegbu a rrọ. Ahwo egọmeti nọ a tu rai ẹdhọ na a rọwo ku edhọ ivẹ na kugbe he, fikiere Brọda Kim avọ Polevodov a wo edhọ ivẹ soso evaọ oke ọvona evaọ ekọto nọ e rrọ Khabarovsk.

Inievo-emezae ivẹ na a wo eyae gbe emọ. Ma riẹ nọ Jihova ọ te gbẹ kẹ inievo na avọ ahwo uviuwou rai ẹzi ọfuafo riẹ re a kru udu ga je kru ẹrọwọ rai rite urere.—Ahwo Filipai 4:7.