Evaọ Akpe 5, 2020, * a ti bruoziẹ Brọda Aleksandr Ganin, Khoren Khachikyan, Andrey Tabakov, avọ Mikhail Zelenskiy, gbe Brọda Sergey Mysin avọ aye riẹ, Nataliya. Okọto Zasviyazhsky nọ ọ rrọ okpẹwho Ulyanovsk a ti jo bruoziẹ na. A sai fi aikpobi na họ uwou-odi te ikpe esa, yọ ejọ e sae vrẹ ere, tube te ikpe ihrẹ dede. Ọnọ o tu rai ẹdhọ na ọ ta nọ jọ okọto na u gboro igho rai gbe imoto rai mi ai, yọ a te roro unuigho rai kpobi kugbe, e sai te 1.57 million rubles (koyehọ enwenọ ₦7,756,000).

Aleksandr Ganin

• Ukpe nọ a yẹ riẹ: 1957 (obọ Ekhabi, Sakhalin Island)

• Iku uzuazọ riẹ: O vrẹ ikpe udhe no nọ ọ họ-ame evaọ ukoko Isẹri Jihova. A pẹnshọ riẹ no. Enẹna ọ rẹ kọ eflawa jẹ kọ emeware jọ

Khoren Khachikyan

• Ukpe nọ a yẹ riẹ: 1985 (obọ Yerevan, Armenia)

• Iku uzuazọ riẹ: O kpohọ isukulu ziezi, yọ o wo idigri evaọ economics. Ọ jẹ hae jọ afe-arozaha lele ahwo sa-sa muabọ evaọ oke nọ ọ jọ uzoge. Rekọ enẹna ohwo owowou ọ rrọ, yọ ọ rẹ gwọlọ ẹme he

• Fikinọ ọ gwọlọ riẹ Ọghẹnẹ ziezi je koko izi riẹ, ọ tẹ rọwo nọ Isẹri Jihova a wuhrẹ Ebaibol kugbei. Oware jọ nọ o lẹliẹ Ebaibol na were iẹe gaga họ, eme riẹ kpobi e gba kerọ ọka, yọ e wọso ohwohwo ho

Sergey Mysin

• Ukpe nọ a yẹ riẹ: 1965 (obọ Kulebaki, ubrotọ Nizhny Novgorod)

• Iku uzuazọ riẹ: Nọ o je wuhrẹ iruo engineer ọ rọ ruẹ ọmọtẹ nọ a re se Nataliya. Aimava a tẹ rọo evaọ 1991. O vrẹ ikpe udhe no nọ aimava a be rọ gọ Jihova. A wo emọ ivẹ nọ i te ahwo no. Erozaha sa-sa e rẹ were Brọda Mysin, maero kọ onọ a re se lacrosse

Nataliya Mysina

• Ukpe nọ a yẹ riẹ: 1971 (obọ Leningrad, nọ a bi se Saint Petersburg enẹna)

• Iku uzuazọ riẹ: A yẹ riẹ evaọ uviuwou nọ ahwo jọ a jọ rrọ isoja. Obọ Germany ọ rria bẹsenọ o ro nwrotọ no isukulu ilogbo nọ ọ jọ wuhrẹ kpahe imu. Emu-othere ọ rẹ were iẹe gaga, yọ o re beki eware re

Andrey Tabakov

• Ukpe nọ a yẹ riẹ: 1973 (obọ Minsk, Belarus)

• Iku uzuazọ riẹ: Oria nọ a rẹ jọ fi evuẹ họ ekọmputa gbe eware itieye na ọ be jọ ru iruo. O wo aye evaọ ukpe 2006, yọ odẹ aye riẹ Marina. Isẹri Jihova a wuhrẹ Ebaibol kugbe aimava, kẹsena a tẹ họ-ame. Iredio gbe ekọmputa ọ rẹ mai ro ru iruo riẹ

Mikhail Zelenskiy

• Ukpe nọ a yẹ riẹ: 1960 (obọ Bulaesti, Moldova)

• Iku uzuazọ riẹ: Ọ jẹ hai bi ekọ oyibo, yọ ọ jẹ hae dhẹ imoto ilogbo re. O wo aye evaọ ukpe 1989, yọ odẹ aye riẹ Victoria. Nọ 1990 ọ vrẹ no, a te mu Ebaibol họ ewuhrẹ. Oware nọ a jọ Ebaibol wuhrẹ u ru nọ a ro you Jihova ziezi, kẹsena a tẹ họ-ame

Enwenọ ikpe esa nọ i kpemu, iporisi Russia nọ a re se Federal Security Service (FSB) a te mu ẹro họ efihọ inievo mai nọ e rrọ obọ Ulyanovsk. Eware wọhọ ekamẹra a je ro ru onana. A tubẹ rekọdo eme nọ inievo mai a ta evaọ ifonu. Evaọ Ava 24, 2019, FSB a te fi odẹ Brọda Sergey Mysin avọ aye riẹ, gbe Brọda Khachikyan, Tabakov, gbe Zelenskiy họ otọ inọ a be thọ uzi egọmeti.

Nọ edẹ esa e vrẹ no, evaọ ighọjọ isoi ohiohiẹ, iporisi e tẹ vẹruọ uwou Brọda Khachikyan, te orọ Tabakov, gbe orọ Zelenskiy. A te mu aimasa na nyai fihọ obọ ogba iporisi. Ẹdẹdẹ yena evaọ ohiohiẹ, ohwo jọ ọ rọ ifonu se Sista Mysina. Ohwo na ọ tẹ ta kẹe nọ omoto rai ọ raha no, inọ jọ ọyomariẹ avọ ọzae riẹ a nyaziọ obọ otegu. Nọ Brọda Mysin ọ nwani rovie ẹthẹ, iporisi FSB a te duwu ruọ uwou na. A te mu uwou na kpobi họ ẹkiẹ, a tẹ tọlọ ifonu gbe etablẹte rai. Kẹsena a te mu Brọda Mysin avọ aye riẹ vrẹ.

Okiokiọ riẹ, okọto Leninsky nọ o rrọ ubrotọ Ulyanovsk o tẹ ta nọ jọ a fi Brọda Mysin họ esẹle bẹsenọ a re guẹdhọ riẹ. A te siobọno Sista Mysina avọ inievo-emezae esa edekọ na kpo rekọ iporisi e kpokpa họ ae obọ nọ a re no uwou rai hi.

Edẹ udhuvẹ gbe ikpegbisoi Brọda Mysin ọ jọ esẹle. Nọ a siobọnoi no, a tẹ ta nọ jọ o no uwou ze he evaọ edẹ udhozeza-gbesa (123), yọ ere o ru. Edẹ udhuvẹ-gbikpe Sista Mysina, gbe Brọda Khachikyan, Tabakov, avọ Zelenskiy a no uwou ze he, ejọ evaọ usu rai e tubẹ jọ uwou te edẹ udhuvẹ gbe ikpegbisoi dede.

Evaọ ohiohiẹ Asoi 15, 2019, iporisi FSB a kiẹ uwou Brọda Ganin, kẹsena a te mu ei. A te fi ei họ esẹle edẹ ivẹ.

Obọnana a siobọno inievo ezeza nana no, izi jọ ọvo egọmeti o fihọ kẹ ae kpahe oria nọ a rẹ nya mu. O make rrọ ere na, a gbẹ be rọ idhere efa kpokpo ai. Egọmeti o ru nọ Brọda Mysin avọ aye riẹ gbe Brọda Tabakov a gbẹ be sae rọ rehọ ugho rai nọ o rrọ ebanke he. Ugho nọ o rrọ akanto Brọda Mysin avọ aye riẹ o joma bu te 500,000 rubles (koyehọ ₦2,470,000), onọ o rrọ akanto Brọda Tabakov kọ enwenọ 600,000 rubles (koyehọ ₦2,964,000).

Ma lẹ nọ jọ udu o jọ inievo mai nọ e rrọ obọ Russia awọ ẹsikpobi nọ a tẹ kareghẹhọ ẹme nọ ọso-ilezi na ọ ta evaọ Olezi 46:1, inọ: “Ọghẹnẹ họ oria adhẹzọ mai gbe ẹgba mai, ọ rẹ kake dhogbo ze ti fiobọhọ evaọ oke idhọvẹ.”