Egọmeti United States gbe erẹwho Europe nọ i bu te enwenọ ọgba soso a ta nọ oware nọ Russia o bi ru na u woma ha, nọ a bi ro kpokpo inievo mai jẹ lahiẹ ae. Erẹwho nana kpobi a whobọhọ ẹme nana evaọ ẹgwae nọ ukoko nọ a re se Organization for Security and Co-operation in Europe (OSCE) a gba evaọ Ahrẹ 23, 2020. Ogbẹgwae nọ a re se Permanent Council * evaọ ukoko yena ae a wuzou ẹgwae na.

Aye jọ nọ a re se Ms. Lane Darnell Bahl nọ ọ rrọ ohwo ẹro United States evaọ ukoko OSCE na ọ ta nọ: “United States avọ erẹwho efa buobu nọ i kokohọ ọgwa nana nẹnẹ na a ta epanọ oware nọ Russia o bi ru Isẹri Jihova na o be kẹ ae uye te, yọ a te fare unu hu. Ma gbe bi yo nọ iporisi a be bẹre ruọ iwou Isẹri Jihova, a bi mu ọnọ obọ rai u te kpobi, a be jọ ekọto bruoziẹ kpe ejọ je bi fi ai họ uwou-odi te ikpe ezeza dede, yọ a be lahiẹ ejọ.”

O kẹ ahwo OSCE na uye gaga nọ a yo kẹle na inọ iporisi Russia a vẹruọ iwou Isẹri Jihova nọ i bu vi udhusoi (100) soso nyai mu imu evaọ ubrotọ Voronezh. Ms. Bahl ọ ta nọ: “Oware riẹ u gbo kẹhẹ, nọ egọmeti Russia ọ be rọ wọso egagọ nọ i re ru ozighi hi ga te ere.”

Aye ọfa nọ a re se Ms. Nicola Murray, nọ ọ rrọ ethabọ ohwo nọ o wuzou utu nọ u dikihẹ kẹ United Kingdom (UK) evaọ ẹgwae na, ọ tẹ jẹ ta nọ “oghẹrẹ nọ iporisi e be rọ nyae kiẹ iwou Isẹri Jihova kẹse kẹse re a gwọlọ eware nọ a sai ro kru rai, be vẹruọ iwou rai buobu evaọ oke ovona, u dhesẹ nọ a gba riẹ mu no inọ a re si egagọ Isẹri Jihova no otọ riẹriẹriẹ.” Ms. Murray ọ tẹ gbẹ ta haro nọ: “Eware nọ a be ta nọ iporisi na a ruẹ nọ a be rọ fiki riẹ mu ai hayo si obe kẹ ae na, yọ eware nọ ahwo buobu a re ru evaọ egagọ rai.”

Ms. Bahl ọ ta re inọ iporisi Voronezh na a be fake wọ eku họ Isẹri Jihova uzou inọ “a be lẹlẹ ru eware nọ e wọso uzi egọmeti.” Kọ eme a ta nọ a ru, nọ o wọso uzi egọmeti na? Anọ a kere eware fihọ ebe gbe ekọmputa, a be hai kokohọ oria ovo ru eware kugbe, jẹ rọ ifonu hayo ekọmputa thuru kugbe ohwohwo ru iwuhrẹ rai. Ms. Bahl ọ ta nọ “oware riẹ u gbo kẹhẹ” nọ egọmeti Russia ọ be rọ rehọ fiki eware itieye na mu ahwo. Ọ jẹ ame họ agba tae he. Ọ tubẹ ta nọ: “Koyehọ mẹ omamẹ mẹ be lẹlẹ wọso egọmeti re, keme me bi ru eware itieye na kẹdẹ kẹdẹ.” Ọ tẹ jẹ ta nọ makọ ahwo ẹro Russia nọ a rrọ ukoko OSCE, nọ a thuru kugbe ẹgwae nana evaọ obọ ẹwho rai na “a bi ru ọkpọ eware nọ a be rọ fiki riẹ mu ahwo na.”

Erẹwho udhegbihrẹ nọ e rrọ ukoko European Union (EU) gbe erẹwho eree efa a ta nọ: “Ahwo ẹro Russia nọ a rrọ ogbẹgwae Permanent Council na a vuẹ omai unuẹse buobu no inọ egọmeti Russia ọ kẹ Isẹri Jihova uvẹ re a ru eware egagọ rai, yọ a te whaha ae he keme uzi Russia o ta nọ ohwo kpobi ọ rẹ sae jọ egagọ nọ e were riẹ, jẹ rọwo oware kpobi nọ ọ gwọlọ rọwo. Ghele na, ẹsikpobi ma bi yo nọ iporisi a be vẹruọ iwou Isẹri Jihova, a ve mu ai jẹ rehọ ai guẹdhọ evaọ okọto. Onana u wo ohẹriẹ gaga no oware nọ ahwo ẹro Russia nọ a rrọ usu mai a vuẹ ogbẹgwae nana.”

Ahwo ẹro EU nana nọ e be kiẹ ẹme na riwi na a tẹ jẹ ta nọ: “U fo nọ a rẹ kẹ ahwo kpobi, te Isẹri Jihova uvẹ nọ a re ro ru eware nọ ohwo-akpọ kpobi o wo udu riẹ. Ohwo kpobi o wo udu nọ ọ rẹ rọ jọ egagọ nọ e were riẹ, rọwo oware nọ o were riẹ, kuomagbe ahwo, kokohọ oria dhedhẹ, jẹ ta eva riẹ. A rẹ whaha utu ahwo jọ họ. Obe-izi egọmeti Russia, te eware nọ Russia ọ whobọhọ evaọ OSCE na, gbe izi nọ e be kpọ erẹwho kpobi i dhesẹ nọ ere u fo nọ o rẹ jọ.”

Nọ Ms. Murray o je ku ẹme riẹ họ, ọ ta nọ ahwo nọ a dikihẹ kẹ UK a be vuẹ egọmeti Russia inọ jọ a siọ Isẹri Jihova ba ekpokpo.

Ms. Bahl ọ ta nọ jọ egọmeti Russia (1) ọ gbẹ rehọ Isẹri Jihova kpohọ ekọto ho, (2) o siobọno oria nọ u wuzou iruẹru Isẹri Jihova evaọ Russia nọ o mi rai na, (3) je siobọno Isẹri Jihova kpobi nọ a fihọ uwou-odi ababọ oke oraha.

Orọnọ onana họ orọ ọsosuọ nọ erẹwho sa-sa a rọ whọku egọmeti Russia ha, fikinọ a bi kpokpo inievo mai. A be hai si ai ozọ ẹsikpobi. Akpọ na soso ọ be ruẹ oghẹrẹ nọ Russia o bi ro gboja kẹ inievo mai. Maero na, Jihova ọ be ruẹ oja nọ inievo mai a be re evaọ obọ Russia. (Olezi 37:18) Ọsẹ oyoyou mai na ọ te kẹ inievo na udu gbe ẹgba nọ a sai ro thihakọ ukpokpoma na te urere.—Olezi 37:5, 28, 34.