Nọ inievo ukoko na nọ e rrọ ẹwho Orenburg, evaọ obọ Russia, a yo nọ a kpe inievo-emezae isoi mai nọ a fihọ uwou-odi evaọ ẹwho na ukpe igbabọ gaga, a tẹ nya kpobọ uwou-odi na vẹrẹ vẹrẹ re a fiobọhọ kẹ inievo na. Ẹwho nọ a re se Saratov nọ o rehọ emaele egba isoi (500) [ikilomita egba eree (800)] thabọ no Orenburg, inievo nana nọ a fihọ uwou-odi na a no ze, edẹ inievo na họ: Aleksey Budenchuk, Gennadiy German, Roman Gridasov, Feliks Makhammadiyev, gbe Aleksey Miretskiy.

Iyẹrẹ nọ a fihọ itanẹte evaọ Ava 15, 2020, i dhesẹ nọ elakpa nọ e be rẹrote uwou-odi nọ a re se Penal Colony Ọrọ 1 evaọ Orenburg, a kpe inievo isoi nọ a fihọ uwou-odi nọ i no obọ Saratov ze na ukpe igbabọ, yọ a jẹ rehọ ekpọ fa ae. Nọ a se iyẹrẹ na no, inievo-emezae gbe erọ emetẹ mai jọ nọ e rrọ ẹwho Orenburg na a tẹ nya kpobọ uwou-odi na. Ozọ u mu rai vievie he, a dhesẹ omarai nọ ae omarai yọ Isẹri Jihova, dede nọ onana u ti fi uzuazọ rai họ ọza. Nọ inievo na a te etẹe, a tẹ ta kẹ elakpa nọ e be rẹrote uwou-odi na nọ a dihọ inọ, a gwọlọ riẹ epanọ eware e rrọ rọkẹ inievo isoi mai nọ a fihọ uwou-odi na. Fikinọ iyẹrẹ na e ta nọ Brọda Makhammadiyev ọ nwoma gaga fiki ukpe na yọ a fi riẹ họ ẹsipito, inievo nọ e rrọ Orenburg na a tẹ ta nọ a gwọlọ riẹ sọ ọ gbẹ rrọ uzuazọ. Ẹme nọ a lele elakpa nọ e be rẹrote uwou-odi na ta o rehọ enwene euwa ivẹ.

Inievo nọ e rrọ ẹwho Orenburg na a te je ru ọruẹrẹfihotọ re inievo jọ a hai fiobọhọ kẹ inievo nọ a fihọ uwou-odi na, eyae rai, gbe elọya rai. Kẹse kẹse inievo Orenburg na a re kere ileta uduotahawọ ro se inievo nọ a fihọ uwou-odi na. U te no ere no, a tẹ jẹ zọhọ ugho rọkẹ inievo nọ a fihọ uwou-odi na re a sae dẹ emamọ emu nọ a rẹ re, enọ a jọ uwou-odi na wo ho.

Uyoyou nọ o rẹ hiẹ hẹ nọ inievo-emezae gbe erọ emetẹ nana a dhesẹ na, yọ obọdẹ isẹri rọkẹ ahwo nọ a bi ruiruo evaọ uwou-odi na. A be ruẹ epanọ Isẹri Jihova a you ibe Ileleikristi rai te, makọ enọ e rrọ ugbothabọ nọ a re ruẹ ẹdẹvo ho dede.

Emamọ iyẹrẹ itienana e rẹ tuduhọ omai awọ gaga, keme i bi dhesẹ nọ inievo mai a bi ru lele ohrẹ Ebaibol nọ o rrọ Ahwo Hibru 13:3 na, onọ o ta nọ: “Wha hai wo enọ e rrọ uwou-odi họ iroro wọhọ ẹsenọ a fi owhai họ uwou-odi kugbe ai, gbe enọ a be lahiẹ, nọ orọnọ whai omarai wha rrọ ugboma na re na.”