Evaọ owọwọ Ava 10, 2020, iporisi ẹwho nọ a re se Chita evaọ Russia a gboja kẹ Brọda Vadim Kutsenko nọ ọ rrọ omọvo Isẹri Jihova. Iporisi na a je kpe Brọda Kutsenko gaga, be do ẹe uvou jẹ be rọ ẹlẹtriki shọko riẹ eva gbe awọ. Nọ a bi kpei na, yọ a be ta kẹe re ọ vuẹ ae kpahe Isẹri Jihova efa.

Evaọ ohiohiẹ ẹdẹ yena, iporisi nọ a re se Federal Security Services (FSB) a nyae kiẹ iwou Isẹri Jihova nọ e joma bu te udhuvẹ soso, te ọrọ Brọda Kutsenko. Nọ oke u te ighọjọ ikpegbọvo aso no, iporisi a tẹ nyai mu Brọda Kutsenko evaọ obọ uwou oni-aye riẹ. Iporisi na a fi egbregba họ iẹe abọ, a te je ruru ovao riẹ, kẹsena a tẹ wọe kpobọ ẹwọ jọ nọ ọ kẹle etẹe je mu ei họ ekpe. Ghelọ epanọ a kpe Brọda Kutsenko te na, ọ rọwo vuẹ ae oware ovo kpahe Isẹri Jihova efa ha. Nọ iporisi na a ruẹ nọ ọ be rọwo vuẹ ae oware ovo ho ghelọ epanọ a daoma te, a tẹ wọe kpobọ ọfisi rai re a gbẹ jọ obei nọe enọ.

Kẹsena a te fi Brọda Kutsenko avọ inievo esa efa nọ a jọ ẹwho Chita mu evaọ okenọ a jẹ rọ kiẹ iwou inievo na riwi na họ uwou-odi evaọ omoke jọ. Edẹ inievo na họ, Sergey Kirilyuk, Pavel Mamalimov, gbe Vladimir Yermolayev.

Nọ edẹ ivẹ e vrẹ no, okọto nọ a re se Ingodskiy District Court o tẹ ta nọ a nyasiọ Brọda Kutsenko, Brọda Kirilyuk, gbe Brọda Mamalimov ba uwou-odi edẹ esa efa. Okọto o tẹ ta nọ a siobọno Brọda Yermolayev, rekọ a tẹ vuẹe nọ o re no uwou ze he.

Evaọ Ava 15, a te siobọno Brọda Vadim Kutsenko avọ inievo ivẹ nọ i kiọkọ keme a ruẹ oware ovo kru dhobọ nọ a rẹ rọ nyasiọ ae ba uwou-odi hi. A siobọno inievo na ababọ ẹdhọ nọ a gu evaọ okọto, yọ ere a rọ nyasiọ ae ba.

Ma be lẹ nọ Brọda Kutsenko avọ inievo mai nọ e rrọ Russia a gbe “wo udu je kru oma ga ziezi,” re a je fievahọ Jihova inọ o ti fiobọhọ kẹ ae thihakọ edawọ nọ i bi te ai.—Joshua 1:7, 9.